話咁快就到農曆新年，香港交易所(00388)發賀年短片，主席唐家成(Carlson)及行政總裁陳翊庭(Bonnie)齊齊拜年，祝大家蛇年進步，大吉大利、身體健康、生活豐盛喎！今年仲搞搞新意思，除咗有墨寶，仲整扇畫，唔知會唔會煽起港股呢？
開場時Carlson先同Bonnie打招呼，你一句佢一句，明顯feel到二人幾咁合作無間，正如佢哋過去一年喺港交所嘅工作一樣。拜完年，二人即席揮毫，大家又估下佢哋寫咗咩、畫咗咩？
有花有蛇有竹又有福。絲絲相信，喺乙巳蛇年，市場可以錦上添花、富貴榮華；以竹獻福，節節高升！
話時話，港交所團隊上星期先喺瑞士達沃斯出席世界經濟論壇，除咗同各界交流金融市場狀況、地緣政治局勢等，仲將賀年祝福帶到冰天雪地，好誠意地自備道具，場面即刻warm哂。
東網網站 : https://on.cc/東網Facebook專頁 : https://www.facebook.com/onccnews/