Ray Online｜立法會日本考察4日　每名議員預算5萬元

立法會大會放聖誕假，代表團趁機去日本考察4日。根據立法會文件顯示，每個參與考察嘅議員開支預算係5萬蚊。

立法會主席梁君彥率領7個立法會議會聯絡小組委員會委員，包括張宇人、林健鋒、李梓敬、林琳、陳穎欣、鄧飛同嚴剛去日本考察。其實今次考察團原訂由12月18號至24號期間拜訪日本同南韓，不過前排南韓發生戒嚴風波，立法會話會面安排上存在「不確定性」而取消行程。根據立法會文件，當時預計每個議員去兩國嘅開支預算係5萬蚊，來回機票就佔3.2萬，由於東京來回香港航程超過4個鐘，開支以商務客位作預算；香港至首爾，同埋首爾至東京嘅航程唔夠4個鐘，開支就以經濟客位作預算。另外，每個議員嘅酒店住宿預算係大約1萬蚊，膳食同雜項開支就大約7千蚊。

今日係考察第3日，代表團一朝早去豐洲市場，同多位批發商交流，對方提到香港係其中一個重要嘅出口地。另外，代表團聽取豐洲市場內嘅中央批發市場副場長介紹，鮮活海產每日清晨會運去批發市場，下晝由飛機空運香港，傍晚抵達，確保食品新鮮。

香港係日本第二大嘅漁農產品同食品出口市場，梁君彥同日本農林水產大臣江藤拓會面，提到香港人對食品安全有好高嘅要求，而特區政府近年對日本進口食品施加科學化管制措施，係為確保市民健康。飲食界議員張宇人會同特區政府跟進今次會面，以及日本食物安全嘅最新情況，畀政府參考。

在橫濱中華街餐廳用膳

立法會日本考察團行程仲包括到訪當地國會、豐洲市場等等。噚日代表團就去咗橫濱杯麵博物館，同埋世界其中一個最具規模嘅唐人街─橫濱中華街，喺中餐館食飯。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)