無綫《一個因去跳舞》雖然一個星期先播一集，但係五集真係轉眼就過，因為好睇。
好睇在黃智雯唔介意拎自己最有信心嘅嘢－「跳舞」出嚟做主題。試諗吓如果你係一線演員，除咗做戲之外，另一樣最有信心嘅就係跳舞，你會唔會接呢個騷呢？要同班後生仔女比較，仲要係出晒名跳舞勁嘅韓國後生仔女喎。同韓國dancer去弘大busking、挑戰韓國訓練生海量甄選、同女團GUGUDAN一齊跳舞，樣樣嘢都係對自信嘅挑戰。就算呢一切都係節目設計，一去到跳舞就冇得呃人要見真章。Mandy一拍落去GUGUDAN度就見到佢真係差啲（咁得兩日去練人哋首歌差都係好合理），血淋淋嘅事實嚟。
要喺節目度由頭至尾展現自己最有信心嘅一面，但就差唔多每集都受到打擊，冇鏡頭拍住都已經好大心理負擔，何況係拍低咗最後仲要播出街。
睇住Mandy將自己最有自信嘅一面拎出嚟，明知唔夠鬥都要去做嘅勇氣，又見到佢喺每次冇信心時都可以極速調整心態，就係我覺得呢個節目最好睇嘅地方。
好叻呀，黃智dus~ 希望新一年我都學識坦白咁面對自己嘅不足，鍛煉吓，力求進步。各位觀眾，大家都一齊加油！
撰文：方以文（ig: fongemantvman）