【聖誕節】Last minute買禮物　一站式生活百貨實幫到手

話咁快下星期就係聖誕，派對都密鑼緊鼓地開始，仲未諗到交換禮物買咩，又冇時間周圍搵？灣仔有間一站式生活百貨或許會幫到你。O-ASIS佔地三層，有齊生活百貨、餐廳和輕食吧等，更不時舉辦工作坊，大家可以一邊搵食，一邊搜羅禮物。

從地面入口就可以看到一系列聖誕食品，包括多款可愛的Sanrio零食精品、日本限定零食糖果和禮物籃等，去朋友屋企開party唔想兩手空空就最啱。旁邊嘅輕食吧仲推出咗「聖誕限定版日本威士忌味軟雪糕」。

走到二樓的生活百貨店，有更多禮物選擇，由個人護理、精品擺設、廚具家品、嬰兒用品和寵物用品等一應俱全，當中更不乏充滿聖誕氣氛和特色產品，好似聖誕老人包裝的卷裝廁紙、茶包和索袋等，全部都好可愛。講究實用的你就要留意各款精美家品，仲有多個卡通系列，除了Sanrio和Disney外，連Snoopy、龍貓、姆明、麵包超人和近年大熱的柴犬都有齊，唔鍾意卡通嘅，亦有人見人愛的櫻花系列。如果送禮對象鍾意小酌一番，呢度仲可以搵到好多有關酒的特別產品，例如酒樽設計模仿富士山外型的吟釀、金箔酒、和服酒樽套和各款清酒杯。