衛詩雅憑《破地獄》首度封影后　「呢個獎對我太重要！」

入行16年的衛詩雅（Michelle），去年憑《不日成婚2》首次獲香港電影金像獎「最佳女主角」提名，雖未能奪獎，但演技備受肯定。她昨晚（10月23日）終於憑電影《破·地獄》在第39屆華鼎獎奪得「華語最佳影視女演員」。而方中信則憑電影《金手指》於第三屆澳淶塢五大洲電影節金莉花獎獲得「全球最佳男配角」獎項。

衛詩雅得獎後表示，自己非常激動，認為無論任何獎項，對她來會都是一個肯定及被看見的機會，「呢個獎對我嚟講太重要啦！對演員嚟講係一個肯定。亦都係提醒人哋：『我仲喺呢行㗎，大家可以搵我演戲。』憑《破·地獄》呢套電影得到嘅獎項即係代表大家好喜歡我哋嘅電影，所以好開心。」對於來屆金像獎是否有信心獲提名，她坦言：「感覺會實在啲，信心係高咗嘅。」

衛詩雅在電影《破·地獄》中，飾演一名救護員。她表示這個角色無論在體能及心理上都有很大發揮，「心理上嘅話就係大家睇過呢套電影就會明白嗰種沉鬱，長時間培養沉鬱嘅情緒，每日同屋企人好多矛盾、好多爭吵，所以嗰段時間係難過嘅；體能上除咗要練一啲儀式上嘅嘢，亦都要人做好多體能體力嘅瞓練，因為角色係一個救護員，自己對呢方面要求比較高，好希望最貼近個角色，所以有嗰一刻開始我每日都去做gym，嗰段時間體能真係幾好，同埋大隻咗好多，經過呢啲瞓練，之後我真係可以『稱」到個人上救護床。」

她表示，最難忘一幕是跟許冠文拍攝洗澡戲，令她學到何謂敬業樂業，「Michael神喺戲入面飾演我爸爸，有一場戲係我要幫佢沖涼，我記得拍攝嘅時候係冬天，好凍，所有劇組都擔心，佢反而話：『唔緊要㗎，你哋拍到OK先。』佢為我哋嘅畫面、劇情需要行先，好唔錫身咁樣，我又心痛，覺得好深刻又覺得好犀利，好尊敬佢，喺佢身上面絕對學到乜嘢叫做敬業樂業。」

奪得「最佳男配角」的方中信亦表示十分開心，他謂獎項並非屬於他一個人，而是整個拍攝團隊一起努力的成果。他最難忘的是他被殺後伏屍泳池的一場戲，「我記得拍嗰陣時係冬天，其實都幾凍，我要趴喺水面，啲水喺鼻湧入去，係呢樣嘢辛苦啲，我都着咗潛水衣打底其實都OK嘅，問題不大。導演佢哋都好好，安全措施做得好好，搵咗兩個潛水員喺池底Stand by，放晒啲氧氣樽，好安全，但係要孭住啲鉛帶，因為要做到半浮沉嘅效果，恐懼就冇，因為我都有潛開水。唯一係驚個假髮會甩，哈哈。」

昨晚於澳門舉行的第39屆華鼎獎，邀請到石修及歐陽震華擔任「全球最佳男、女配角」及「全球最佳女演員」頒獎嘉賓。