方力申佛山個唱Maple激罕伴舞　高挑出眾任影唔嬲

藝人方力申（小方）自公開有女友葉萱（Maple）後，二人罕有放閃，就連合照及合體現身嘅機會都在冇，雖然小方成日提住女友，但始終未被大眾真實見過拍拖。點知上周小方舉行首個內地個人演唱會佛山站，除有得聽小方獻唱多首金曲，及早前已經預告過會現身嘅好兄弟劉浩龍擔任嘉賓外，原來Maple激罕上台現身支持！

有現場觀眾指，當小方唱《月全蝕》時，台上為佢蒙面伴舞嘅美女正係Maple，只見Maple身材高挑出眾，跳舞好睇又唔怯場。而小方唱到《只愛一個人》，佢又憑歌寄意，冧爆向女友方向四目交投兼派心心，閃爆網友，有網民即留言笑佢成晚對住女朋友扭嚟扭去。而Maple似乎睇得非常開心，離場時同友人有講有笑，就算身旁有人影相都冇黑面，仲被發現一直玩小方嘅應援人形牌，愛得夠煙韌。

東網網站 : https://on.cc/東網Facebook專頁 : https://www.facebook.com/onccnews/