憑《全民造星IV》出道的樂壇新人榛綦(Natalie)曾是女子組合STRAYZ成員之一。轉向個人發展的榛綦,最近推出新歌《第一零一次再見》,早前飛赴台灣拍攝MV,更專程邀請逾6呎高的台灣型男黃柏峰擔任男主角,與嬌小的Natalie組成「最萌身高差」。
Natalie今次初嚐出埠拍攝滋味,她表示:「覺得好喜悅,可以到台灣拍攝,畫面所有嘢都好靚,喺戶外拍攝時,天氣都好好,我係一個見到靚嘢會超級開心嘅人,所以拍出嚟係好靚,希望大家會鍾意。」不過今次台灣之旅,由於拍攝時間緊湊,Natalie每晚收工都要去便利店吃飯團醫肚,無暇品嚐台灣地道美食。
今次MV邀請身型高佻的台灣型男黃柏峰擔任男主角,首次跟對方合作,Natalie坦言最難忘二人的身高差距:「對方同我身高相差成30cm,我企喺度去唔到對方膊頭,所以幾難忘,我哋一齊企喺度嘅話,唔知個鏡頭會唔會同框唔到,身高差太多,好搞笑。」
現實中,Natalie亦接受到30cm的身高差,「好似都幾可愛吖,不過我希望追求者唔好太進取,因為太進取我會有啲壓力,所以比較鍾意性格含蓄啲,等大家透過傾偈慢慢去了解對方。」
Natalie與黃柏峰在MV裡有少許親密鏡頭,Natalie表示:「都有啲比較親密,企close啲、個頭close啲咁,有啲場面都有啲尷尬,始終第一次合作,初初開始都需要時間去互相熟悉,而佢都好友善。」
留言 0