問點解李嘉誠可以咁把炮引入亞洲部超聲波組織碎化系統，無創14分鐘醫肝癌時，建議先了解李嘉誠加埋佢老友周凱旋，咁多年投資咗幾多係醫療創科身上？
話說早排見到千頌C、渾水等香港行家兼老友打卡留念，唔少朋友問係咪有大鑊嘢？唔係，係香港一眾行家出Business Trip環加行，溫哥華一站訪問參觀一間以一氧化氮液態技術抗真菌病毒公司時，預埋小弟。
老友Send張記者KOL名單俾我時，我話，嗯，有1、2個唔識囉，其他全部，係全部都識，部份識咗超過20年，有啲驚嚇。小弟得以同行家聚會之餘，又出席記者會兼參觀實驗室，一時間大學、記者年代回憶返哂嚟。記得初入行做記者，因為做細報的關係，經常見到行家出Trip就好羡慕，羡慕唔係可以成班行家出埠離開公司咁簡單，事關老闆係唔會俾你出完Trip寫幾百字就算數，往往要做埋其他在地故題、做吓街訪，稿債千噸重，但真心可以增廣見聞，因為唔係公司或上市公司名義請，有啲地方係一世，無錯係一世，都唔會輕易去到。
記得入行後第一次出Trip係跟當時仲叫香港電訊（前身大東電報局）Cyn姐去以色列，去特拉維夫、哭牆兼耶路撒冷，訪問一間以色列電訊科技公司。之後辛苦唔辛苦的Trip我都樂意去，試過零下10幾度包到隻糉同《明報》前副採主鍾沛權去河南靈寶踢爆上市公司做假，亦試過3日2夜莫斯科坐螺旋槳內陸機去西伯利亞睇鋁廠，大佬，3日2夜上東莞都未夠，但我來回去咗西伯利亞睇俄羅斯鋁業。而家仲邊有容易去以色列同西伯利亞？
對一個記者而言，有咩好得過親身上場衝鋒陷陣？所以今次老友同我講佢哋成班行家出開Trip來溫哥華，問我有無興趣聚下望下，睇完時間睇下老婆湊唔湊得掂兩個，就即刻Say Yes，基本上老友無特別要求我寫或唔寫，純粹預埋我參觀。不過咁，間公司的科研開正我生物化學嗰辦（記者會原理明90%），記者會忍唔住問咗公司聯合創辦人幾句，加上同維港投資周凱旋周小姐有關，你叫我唔寫都忍唔到手。
首先間公司係加拿大創科公司，叫SaNOtize，公司主要以一氧化氮液態技術去改變病毒株結構以阻止病毒複製，達到抗菌抗病毒效果。SaNOtize旗下一氧化氮噴鼻劑在疫情期間獲歐洲中東及亞洲批准使用，2022年推出賣出200萬枝。作為生化L我當然明白一氧化氮（Nitric Oxidie）係乜有乜用，其實醫學界好早就用緊相關技術，《科學》雜誌1991年已經選定NO係Molecule of the Year。
其次係SaNOtize係發展完對抗呼吸道病毒的噴鼻劑後，未來發展方向係針對灰甲（亞洲人稱為香港腳，但西方叫做運動員腳Athlete's foot）、糖尿病足部潰瘍等，相關產品應該2025年可以面世（公司示範產品，仲有浸腳盆包埋）。
最重要放最後，就係呢間公司其實係2022年8月完成B輪融資，由維港投資同以色列初創投資平台領投。我問聯合創辦人Gily Regev可唔可以講多啲同周凱旋點識，同點搵到周小姐時，佢話其實由另一位研究員Art Slutsky（聖米高醫院Unity Health研究員）引廌，周旋凱用咗10分鐘同佢講電話就決定投資，好似拍戲咁簡單。
小弟入面去SaNOtize實驗室，有啲似小弟大學時抽細胞或者培育大腸桿菌的無菌空間。本來想向班行家介紹溫哥華拳頭咁大粒燒賣有幾好食，可惜成班友癲癲地，溫哥華停一晚就要趕飛機去愛民頓，之後再飛去多倫多，今日睇返啲行家報道，除咗SaNOtize外，成班行家環加之行訪問咗：1) 2020年諾貝爾醫學獎得主、病毒學家霍頓（Michael Houghton）、2) 聖米高醫院（李嘉誠基金會有份捐助興建）Unity Health數據科學及高級分析副總裁Muhammad Mamdani、3) SynthMed（公司透過結合納米技術與生物工程，研發具功能性的紅血球，能夠將藥物精準輸送至體內特定位置）聯合創始人兼行政總裁Maikel Rheinstadter。
佢哋形容係加拿大創科之旅，比較埋加港吸引創科人材措施，個人覺得唔錯。最後一個總結，無論你鍾唔鍾意李嘉誠都好，當大家認為李嘉誠唔知點解可以幫香港引入亞洲首部無創醫肝癌的「超聲波組織碎化系統」（無創治療原發性肝癌或轉移性肝腫瘤，技術促使癌細胞急速膨脹及收縮，不斷重複產生衝擊波，從而直接定點擊碎癌細胞），可以望返李嘉誠或者佢老友周小姐係醫療創科上投資咗幾多。
李鴻彥
https://www.facebook.com/LeeHungYinJoe
註：專欄作家言論不代表本網立場
密切留意BossMind動向！立即CLS
留言 0