Frankie@MIRROR今日36歲生日　女友Christy突列4點為自己澄清

MIRROR成員陳瑞輝（Frankie）今日（7月29日）36歲生日，早前被連環爆出「黑歷史」的女友Christy，突然將其IG由私人轉為公開，更列出4點為自己澄清，回應個多月來的是非。

Christy將多張舊Story整理成「黑歷史」的合集，寫道：「記得click埋入去睇我嘅黑歷史，以後唔使旨意再改我圖誣蔑我，扭曲事實，帶風向誤導其他人。」

第一點，Christy首先向所有受影響人士致歉。「呢件事要由2021年9月13號講起，朋友告知我比人放上tg group同連登，內容係誣蔑，指我鍾意搶朋友嘅男朋友，中學生活淫亂等等。而我留意到某啲相片係我IG早已刪除，所以我肯定係身邊熟人做。由2021年9月到12月，間中都會再比（畀）人偷我泳衣相、跳舞相放上網抹黑、收到騷擾電話及訊息、扮我嘅假account等等。」

第二點，Christy表示大家見到的IG story，大部分都是假。「2021年12月頭，我透過跳舞朋友認識左（咗）AK及Frankie，當時我有朋友提議「捉鬼」，將普通對話圖放上IG close friend story。所以就一開始，我同Frankie講咗呢件事，佢應承幫我捉鬼。所以我有叫佢send相同錄音比（畀）我，令隻鬼信我係同真嘅Frankie傾緊。所以亦解釋到點解咁多對話都係冇頭有尾。去到22年1月尾，隻鬼終於流出咗幾張cap圖，而呢啲圖都由Frankie屋企人及朋友傳返去佢度，但係佢冇解釋，因為唔想打草驚蛇。呢個時候，我更想收窄close friend範圍，放相上story引「鬼」cap 圖。朋友叫我，ig close friend list每次只落一個，每日po捉鬼圖，每日比（畀）唔同人睇story，都配有唔同emoji，當水印咁。我就可以知道 係邊個抹黑自己。1月之後，就冇再有我捉鬼story流出，亦捉唔到隻鬼，我之後亦將所有嫌疑人踢出close friend list。2022年5月及12月，連登再有post講我，但係一張cap圖都冇，所以我同Frankie以為事件已經告一段落。而我一直都有出story去影射隻鬼，恥笑佢每次嘗試抹黑我都唔成功，甚至提議佢要人信服不妨改下圖同埋作得誇張啲。」

第三點，Christy指對方改圖捏造，處心積慮爆料。「雖然無close friend list，但係佢仍然喺我ig入面。你地（哋）見到部分相，係日常story同相。直到今年6月，佢忍到我公開自己係公眾人物女朋友後，佢就放曬咗2年前嘅捉鬼story出嚟，有啲相係佢改左圖，亦有啲相係捏造出嚟。我發現佢有一個album，全部都係由我2020年到2024年嘅cap圖。佢當年唔爆其他相，係因為佢一直處心積慮，由原本淨係想搞死我，去到而家夾埋外人，想搞死埋我男朋友及Mirror。佢甚至夾埋其他fans、連登打手去不斷誣蔑我地（哋），又會開幾個分身扮fans帶風向，萬一發現仍然有人支持Frankie，就會批鬥所有支持者。佢都有叫人去唔同嘅平台，去搵我嘅「黑歷史」，而呢啲所謂「黑歷史」都係由佢2021年開始做出嚟。期間，我懷疑佢有收fans錢去賣我嘅story，透露我男朋友行蹤，我每次睇show都會比（俾）人偷拍放上佢哋圍內嘅group討論。因為我知隻鬼仍然係我ig入面，所以我好多相唔會即時post，亦有問朋友攞相扮去旅行去誤導隻鬼。」

第4點，Christy指媒體沒有fact check就出新聞。「6月爆大單後，誣捏嘅情況更加嚴重，一大堆我唔識嘅人出嚟講我點點點，又話我睇show傾計等等。媒體亦唔使fact check任何野（嘢）就出新聞：正如我口罩小姐原本係表演彈古箏，評判叫我再即興表演其他嘢去拉票，冇準備情況底下先會表演lap dance，咁當然節目出街就淨出咗lap dance嗰段。要去誣捏一個人真係好容易，所有嘢cut頭cut尾加幾張相同字就可以徹底毀左（咗）一個人。我講呢啲嘢，並唔需要你地相信我，亦唔需要為自己平反，只係想交代返件事。最後有人問，你同隻鬼有咩深仇大恨？我可以答你完全冇，佢2018年已經一直扮friend，2020年開始cap我圖，佢將啲圖post完上網之後仲走來叫我 'take care babe’。唯一最有可能，就係佢講過佢家人曾經做傳銷，比（俾）人呃完幾十萬搞到有人上門追數，當佢知我比（俾）前男友拉咗入去做之後，就投射個憎恨落我身上。我從來冇叫過佢買產品或者入去做，反而佢疫情期間，有俾錢叫我幫佢買產品。我當時做左（咗）好短時間，亦因為拍咗三年拖嘅男朋友沉迷傳銷而分手。希望可以交代到件事比（俾）大家明白，件事橫跨咗幾年有太多資訊要整合，我已經盡量簡短地交代。」