鄭秀文重溫十次金像影后提名淚崩　張敬軒任嘉賓稱Sammi為恩人

鄭秀文（Sammi）昨晚（7月14日）在紅館舉行第三場《You & Mi》演唱會，Sammi換上新裝，穿著Rick Owens 皮革晚裝配House of Malakai 金屬頸飾，與第三場的表演嘉賓張敬軒合唱。當她介紹軒仔出場時笑說：「我叫佢『阿仔』，但依家啲人叫佢『阿公』。」然後軒仔從升降台出場時，兩人合唱《笑忘書》後，軒仔輕吻Sammi手背，引起全場觀眾尖叫。

Sammi對軒仔說：「好多年前你做過我演唱會嘉賓。（係呀！）咁你嗰陣時叫做軒仔⋯⋯（依家都係㗎！）依家就叫做軒公，即係升咗呢，仲要係幾何級咁升添！」軒仔說：「我唔知呢個名係邊度嚟？起碼要去到阿公嘅年紀先啦！」Sammi揚言之前兩場嘉賓都是比較新一代的歌手，軒仔細細聲說：「其實我讀緊書嗰陣都有睇《大頭綠衣鬥殭屍》⋯⋯依家我開騷，有時啲後輩嚟到，例如琴晚嗰個後輩歌手（林家謙），佢話9歲聽我首《酷愛》！今晚輪到我，山水有相逢。」

軒仔表示Sammi是他的恩人：「其實唔多歌手會帶我呢啲新人出埠表演，但我好開心，當年我仲係新人嘅時候，Sammi帶我去到馬來西亞做佢演唱會嘅表演嘉賓，我好多謝佢！」Sammi說：「其實一代一代咁樣帶出嚟，你依家都係大人，要帶新人出嚟！」然後軒仔唱《隱形遊樂場》。

雖然已有之前兩場熱身，但Sammi來到第三場仍然很感性，在演唱電影主題曲環節時淚崩。當她唱出過去十次提名金像獎最佳女主角獎項的電影歌曲時，看見電影片段和全場觀眾大合唱，她感觸落淚地表示：「好多謝你哋替我高興，唔知係咪人老咗就容易感觸，頭先睇返一啲自己電影嘅歷程，嘩，原來我嘅青春、我嘅少艾、我畢生嘅努力都放咗喺工作裡面，一眨眼就已經過咗三十幾年。我今日開演唱會，見到依然有咁多人支持，一直陪伴我成長嘅你哋，我覺得好感觸和感動，令我覺得將我青春奉獻晒喺工作上面係好值得。好多謝由我蛋白質少女，嚟到今天已經係中年婦人，你哋都仲咁支持我。」然後Sammi唱《萬物有時》時淚如雨下，幾乎唱不下去，全場歌迷掌聲和歡呼聲打氣。

演唱會尾聲，Sammi換了新裝，以Vetements 牛仔大西裝、Vetements crop 白色小背心、R13 短牛仔褲，配搭Bvlgari 高級珠寶，唱出舊作《記認》，並走近觀眾席。期間她看到大銀幕的自己兩臂結實三頭肌時，不禁大叫：「嘩，OMG，好有型呀！」