星玄｜羅子溢新劇親熱場口多多　楊茜堯呷醋大嗌：要佢跪玻璃

今日係6月4日農曆四月廿八，是日最旺嘅生肖係鼠，得到貴人嘅幫忙，事業發展一帆風順。鼠仔羅子溢主演嘅劇集《家族榮耀之繼承者》呢排熱播中，而喺劇入面，佢唔單止「女朋友」多多，更有唔少激吻大尺度場口，而羅子溢嘅老婆楊茜堯，喺同佘詩曼、林峯嘅直播入面就話，平時會選擇跳過唔睇親熱場口，但林峯就現場即時播放羅子溢同女伴嘅激吻畫面，楊茜堯見到後即刻忍唔住大嗌，仲話要將屋企啲碗打爛，要羅子溢直接跪玻璃，場面相當搞笑！其實羅子溢自結婚之後，佢有份演出嘅劇集都大受好評，依家老婆又開聲隔空做宣傳，子溢嘅貴人肯定就係佢老婆楊茜堯。

今日幸運星係巨蟹座，事業運強，能在職場佔得先機，毋懼競爭。巨蟹女朱千雪（Tracy），即使淡出幕前轉行做大律師，仍然吸引到網民嘅關注，而佢自懷孕以來，都Keep住身兼3職，直至BB出世前一個月，佢先至暫時放低工作。上月中BB終於出世，唔少好友都留言送上祝福，Tracy你事業運強，毋懼競爭，所以你依家要好好休養，等坐完月之後，先再重返職場。

東網網站 : https://on.cc/東網Facebook專頁 : https://www.facebook.com/onccnews/