前夫關注組谷主收ViuTV高層電話 「欣賞佢正視同聆聽問題」

擁有35.5萬人的FB專頁「我老婆嫁左比Mirror導致婚姻破裂關注組」於日前宣佈因對主辦MIRROR演唱會之安排極度不滿，決定於演唱會後永久關閉專頁。

專頁發起人谷主RC事隔3日後，於今天（6月5日）出文指當晚收到ViuTV高層金廣誠致電了解，並澄清並非要攞著數或R飛。

谷主RC全文如下：「上一個post出左三日喇，我就潛左水三日，因為資訊量過大，我好似變左香港首席西客咁😂，係有少少處理唔嚟，沉澱過後，有d說話我都想同大家分享一下。

1）閂group呢個決定真係唔容易做，由無到有，由十個人到一萬人到十萬人到三十五萬人，我相信我比任何人更唔捨得。喺僅餘嘅自由下，我希望運用我小小嘅影響力，將呢個訊息傳遞比（畀）主辦單位知道，而幸運地我做到喇，金生（金魯花個金）喺當晚深夜打左（咗）個電話比（畀）我，本身我準備沖涼已經除哂衫，所以我赤條條咁同佢表達左（咗）我嘅心聲，我好appreciate（欣賞）佢咁快去正視同埋主動聆聽問題，如果比著係其他台，可能佢又報警話比（畀）網民欺凌喇，至於後續係點就留待大家自己觀察。」

「2）必須要澄清，我係RC唔係R師，我嘅職責係管理呢個group而唔係透過個group攞著數，我老婆有朋友幫佢撳到實名嘅門飛，我無亦都唔需要透過呢個形式去R飛。Btw我收到msg出六位數要買個group，sorry出手太低喇，出5億我就賣啦，我送埋我個個人ac比（畀）你都仲得（有留言話好多人話金生要買我個group，我嚴正聲明，唔係呀）

3）呢個決定係有d衝動，不過我唔衝動嘅話當日就唔會建立到呢個group，所以我又覺得成件事好合理。我預計閂group之後會有其他group應運而生，請各位注意網絡安全，現階段我無打算會再開第二個group，如果有需要繼續圍爐，可以移師去『前夫反擊戰』，雖然我唔係版主，但我百分百相信我兩位admin會繼續有良心咁去管理嗰個group。」

「4）點解我唔即刻閂group？第一，呢個演唱會係大家嘅焦點，可能仲有嘢想講，咁就講埋先囉。其次，呢度有好多我地（哋）嘅回憶，希望餘下個零月時間可以比（畀）大家懷緬一下。第三，我未夠心理準備去撳呢個制。如果你想先行離開，我都感謝你呢一年嘅支持，如果你想留守到最後，咁我最後一個post先多謝你啦😂我地會於明天開始繼續如常批post，但唔會再接受入group嘅申請。最後，我無意去放大事件或者分化鏡粉，開group時我希望大家開開心心，而加（依家）都係。Mirror 12位成員，如果我有幸做成你地嘅困擾，我心感抱歉，請你地（哋）好好準備演唱會，唔好令入場嘅觀眾失望，唔好浪費我老婆嘅心機，你張飛真係好難搶。

RC 15:00 5/6」