防彈V Jennie拍拖鐵證第七彈 京畿道撐枱腳女友視角相簿全公開

紅遍全球的韓團防彈少年團(BTS)的金泰亨(V仔)及BLACKPINK成員金珍妮(Jennie)，自今年5月被遊客偷拍到秘遊濟州後，即瘋傳熱戀，雖則雙方Fans左搵右搵證據喊晒口話P圖，但有航空公司職員在網上大爆目擊Jennie及V同機兼坐商務客位，加上雙方公司對旗下藝人有緋聞一向火速否認，RM話秘密結婚即日出PO話唔係，JK傳戀紋身師亦火速否認，但呢對提都冇提過，可信性增加50%。

TEXT:星島頭條娛樂組

雖然尋日BTS的公司BIG HIT MUSIC終於發聲明表示會保護藝人，嚴禁肇事者對BTS進行惡意活動，如誹謗、人身攻擊、性騷擾、傳播毫無根據的信息和惡意批評，亦透露發現多個包含虛假信息的誹謗帖文會進行法律咨詢，就咁嘅，全文無對傳得好勁嘅VJ戀進行否認，而寸爆黑客亦強調自己無收過任何法律查問。

當Fans一廂情願認為VJ戀冇可能，覺得偶像只會愛佢哋唔會拍拖，8月尾，一張V仔在化妝室整頭照片流出，相中更見到Jennie在V仔身後拎手機拍住V仔，而V仔更展現怕醜笑容。全球ARMY(BTS Fans暱稱)好齊心，均認為是合成圖片，更放大圖片分析光暗位及耳仔角度，全民化身偵探相當好笑。

之後VJ戀證據陸續曝光，包括兩人穿情侶裝在等電梯，Jennie黐實V仔對鏡自拍，從現場環境可見，是V仔於19年一炮過以51億韓圜（約3,400萬港元）購入，位於首爾江南區三城洞的SK Apelbaum 3000呎豪宅電梯位，過往V仔經常在同一位置自拍。然後又有着住情侶小熊維尼TEE的兩人在電梯內自拍、接住有Crop咗頭嘅男人親吻Jennie額頭預告及拖手照、最令Fans無話可說的濟州旅行錫錫照、Jennie明顯影畀V仔睇的浸浴照及最新的Lunch撐枱腳照片。

最新一輯VJ戀證據，可見V仔及Jennie在京畿道約會，兩人喺一間好別緻的韓式餐廳食Lunch，寸爆黑客今次相當貼心，公告埋餐廳資料，Fans想去偶像拍拖時坐過嘅枱椅用餐都唔使四圍搵，另外黑客又公開埋相片的Caption，包括在一張VJ分別只見半邊面的相片中，寫上「你是我的另一半。」，Jennie冧仔的確有一手。

另外，黑客昨早曝光多張Jennie的私相簿，當中有舊愛G-Dragon、Kai及現役男友V仔的照片，奇怪地還有V仔隊友Jimin的照片，其中一張目錄圖更打上「18禁」字眼引發網民熱烈討論，另有一張一名肌肉猛男露股照。從GD遮住臉的側面照，估計是今年4月BIGBANG推出單曲《Still Life》 時GD的金長髮造型。EXO成員Kai的照片，則是與NCT香港成員Lucas的合照，Jennie與Kai於2019年曾公開認愛，但戀情只維持25日就結束。

此外，黑客又拖Jennie隊友Jisoo下水，表示：「我說過Jisoo都知道事情真相，她是位誠實善良的人，她跟泰亨（V）沒有任何關係，但是她可以幫助我們看清真相。」並指Jisoo知道Jennie跟V出去約會，只是她不能說。

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ