MC張天賦元旦推新歌　寒冷天氣濕身拍MV：手指腳趾無知覺

MC張天賦將於2025年第一日推出新歌《說謊者》，2024年歌影兩棲發展神速的他，2025年會繼續密密做。MC說：「新歌《說謊者》作曲有陳可為、王澄晞填詞、監製徐浩、主唱是我。歌詞內容其實講主角要講大話，忍痛和另一半分手後的傷痛和背後原因。」

MC在MV 中「食釘」又「黐牆」，他說：「今次MV拍攝其實頗輕鬆，因為都係啲Mood Shot嘢，當初公司同我提議有一幕食釘嘅時候，令我諗起林宥嘉嗰首歌《說謊》，因為『說謊的人要吞一千根針』，所以寓意講一個大話就要呑一粒釘。其實食釘都 OK 嘅，因為其實係朱古力加糖衣整嘅，雖然冇特別好食，但係易入口、即溶嘅。然後『黐喺埲牆度』就係寓意主角為咗抑制自己，唔去同嗰個人有接觸就黐住咗自己。」

MC表示「黐牆」其實都幾辛苦：「因為會跌落嚟，要咁安全就要在我身上黐滿膠紙，又會勒到我某啲部位…你知啦，有時hold住一個動作太耐都會想微微郁吓，但係又黐到好實喎…」。拍攝當日天氣急速轉冷，晚上正當MC準備拍攝「濕身」部份及最後一個鏡頭時，天文台更發出寒冷天氣警告，幸好最後拍攝順利，MC苦笑表示「凍到我啲手指腳趾全部都冇晒知覺！」