每個演員都等待一個代表作， 模特兒出身的王智騫 (Martin)，於電影《熱血合唱團》已經有機會跟前輩劉德華演對手戲，今年又遇上另一個代表作—電視劇集《i.Swim》。
Martin 在劇中飾演學霸阿帆，雖然不是主角，但討論度不遜於 Edan、Jeffery 等角色。劇集成功令他「入屋」，Martin 的 IG followers 數目亦於劇集播出後跳升了十倍，他十分感謝觀眾支持，同時亦有留意網民對他的意見。
訪問當天，Martin 刻意放慢了說話速度，原來他留意到有人指他說對白時有懶音，他知道要努力改善，「特別係平日講嘢，我都會多咗留意呢樣嘢，因為都驚講嘢講太快，唔小心啲懶音又跑返出嚟。如果連普通presentation (表達)都做唔好嘅時候，大家會無咁容易去接受。」
劇中 Martin 飾演一名學霸，放學後跟隊友練水，這個角色設定跟他反差很大，因為求學時期的他並不享受做運動，反而因修讀視覺藝術，課餘時間多在美術室繪畫。「運動習慣真係呢幾年先有，嗰陣時公司覺得你作為一個artist(藝人)，多啲條件，你就會容易拎到多啲機會，咁我就開始咗運動人生啦。」
健身啟發人生目標
由覺得運動是「折磨」，到目前一星期健身三天，Martin 慢慢發現苦練的成果，既提升外在條件，亦能訓練意志力，「過程中令我學識做嘢唔好係咁問點解，只要一直做落去，就會有成果見到。」
《i.Swim》中學霸的健碩身材，就成為他一大賣點，所流汗水亦獲得回報。Martin 最滿意自己身型算均勻，「唔會話邊度特別大隻，邊度特別弱咁，因為我幾著重整體比例」。但跟不少 gym 友一樣，他亦很怕 Leg Day (操腳日)，「操嗰下都唔係最辛苦，操完腳第二日好辛苦…」
拍戲不會局限自己
知名度、人氣大增，網上多了人討論自己，他沒有感到壓力，「我見到大部分觀眾都好 support (支持) 呢個角色，所以我自己嘅關卡已經過咗。」
Martin 希望未來可以有更拍攝機會，最希望能向觀眾呈現自己不同形象，不要被定型為「乖乖仔」，「我係好想做唔同嘅角色，我想俾觀眾記得嘅係個角色，而唔係記得我係一個點嘅人，我係可以大家覺得乾乾淨淨咁行出嚟，同時我係可以好邋遢，好污糟咁樣去做一個角色。」
時裝悟出人生道理
不少網民形容 Martin 外表酷似韓國演員、模特兒李洙赫，事實上，Martin 讀書時已經是兼職模特兒，大專修讀時裝設計。
對時裝甚有研究的他，己對衣物搭配十分有主見，但很怕別人問他意見，因他深信「人揀衫」道理，「每個人都唔一樣，每日想表達嘅嘢都唔同，或者自己外在條件、身型比例都唔一樣，所以唔需要盲目去跟從潮流，最緊要係搵到啱自己、內心想表達嘅嘢。」
而自己喜歡的書籍也是和時裝設計有關，特別向讀者推介《Little Book of Yves Saint Laurent》一書，這是一個時裝設計師成立自己服裝品牌的故事，令他甚有啟發，「有啲嘢大家望落去好似係一帆風順，或者好光鮮亮麗，其實背後唔知經歷咗幾多次天跌落嚟嗰種感覺，跟著默默咁捱落去，先會有咁嘅成果。」
問他是否有感而發，Martin 笑說，自己現階段人生閱歷仍不算多，可能還在年輕，當遇到問題時候，「好多人喺身邊 support 我。所以暫時個天仲未跌落嚟。」這顆矚目的新星，不知數年後再讀此書，會否有另一番體會？
鳴謝：
Wardrobe: Sandro
留言 0