Ray Online｜何俊賢稱抗生素餵豬影響不及直接服用抗生素　政府反駁：一生人唔會只食幾日豬肉

立法會今日討論預防抗藥性細菌，漁農界立法會議員何俊賢唔滿意政府嘗試禁止豬農用抗生素，佢話市民食餵飼抗生素嘅豬肉，影響遠遠不及直接食抗生素。不過，醫務衞生局副局長李夏茵反駁，病咗先會食抗生素，「可能係得幾日，但我相信你一生人唔會只食幾日豬肉」。

至於提出呢項口頭質詢嘅民建聯議員陳克勤關注，市民直接棄置家居產生嘅藥物會污染環境，質疑點解唔喺公立醫院設立回收藥物系統。李夏茵回應話，因為唔知道病人點樣保存藥物，唔可以確保藥物冇受污染或者冇影響藥效，基於安全考慮唔會將藥物回收重用。

政府希望由源頭減少派發藥物

陳克勤即刻叫李夏茵唔好歪曲佢嘅意思，他強調嘅係回收藥物，而唔係叫人重用。李夏茵再回應話佢未講完，強調當局做法係由源頭減少派發藥物，而唔係回收，舉例減少派發撲熱息痛藥物，等市民用完先去拎。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)