吳文忻暫停化療轉自然療法　改名為避人生大劫非求子

剛在10月17日踏入50歲的吳文忻(Nathaliie、現改名吳忻熹)，在IG分享了大量親朋為她慶祝生日的相片。而早前亦接受了商業一台《星光背後》專訪，當中分享今年8月乳癌復發擴散至淋巴後、由絕望崩潰變振作公開病情的經歷，亦披露正計劃出版抗癌書籍，以生命影響生命，鼓勵一眾患病同路。

Nathaliie於2011年結婚生女後淡出娛樂圈，今年8月自揭乳癌復發擴散至淋巴。訪問中Nathaliie提到8月開始曾接受3次化療，但治療副作用令她飽受痛苦煎熬：「第一次之後返到屋企，骨痛痛到攤係沙發郁唔到，當時心諗：『第一次已經咁辛苦，咁仲有年幾我點捱？』」但她承認化療的確有顯著效果，之後Nathaliie在社交平台分享抗癌經歷，意想不到獲得大量鼓勵及支持，更經友人介紹選擇暫停化療，赴泰國接受另類治療法(免疫治療)：「之前第一次化療後咳得好勁，講嘢每一句都咳。呢個療法嘅概念完全唔同，係增強自身嘅免疫細胞。大概3個月至半年就會知有冇效，佢哋有個機器可以check到癌指數，已經由13跌到去11，都係要之後再睇report。半年後都會叫我照多次，double confirm成個身體係冇晒癌細胞，跟住之後就完架喇。」

Nathaliie回想兩年前最初病發：「聽唔到醫生講咩，佢講所有嘢我都聽唔入耳，前後我睇咗3個醫生，但都唔係好聽到人哋講咩。好迷茫，好驚。」而且怕嚇壞家人隱瞞病況，心態上更想逃避治療：「兩年前淨係切癌組織，醫生建議全切（左邊乳房）一了百了，因為根據佢經驗多數都會復發，我個時梗係接受唔到啦，單邊喎，接受唔到囉。」

直至今年復發，Nathaliie從逆境獲得領悟：「知道復發絕對有聯想過死亡兩個字，但亦令我反思。其實cancer唔會突然就有，一定係長時間累積了問題，例如生活習慣，或者心情唔好，冇好好照顧自己嘅心靈。我覺得係一個反思畀自己諗返有咩出錯咗令自己有呢個病。」
訪問中Nathaliie亦提到2013年改名為吳忻熹，澄清並非因外界所指求子心切，改名全是因為曾被指人生有一大劫：「唔係迷信，唔止入行後接觸不少風水命理，我求其上網一search，吳文忻呢個名的筆劃就話係大兇。有人同我講改完名健康比較好，我唔理有冇成效，又冇傷害到人，點解唔做呢？但或許有啲嘢係整定嘅，例如今年有這個大劫，都係會發生，但過到就ok。所以凡事都要保持自己正面去面對。」Nathaliie披露會將經歷記錄出書，希望夥其他曾患癌的藝人出版一本書或籌辦一個慈善影展，將籌得善款予抗癌慈善機構。至於未來心願，除了身體健康，可以陪伴兩女長大外，更加想鼓勵有需要的同路人。