HOY TV節目《Lolly Lolly寵物拯救隊》由女團Lolly Talk主持，今日（24日）播出的第二集，Lolly Talk在錦田一個照顧流浪貓狗的中心學習照顧狗狗，分別挑戰沖涼、煮大鑊飯任務，其中Meimei與阿蛋笑指狗狗大鑊飯似足女團健身餐而阿妹及Tania幫狗狗沖涼，更弄得全身濕透。
《Lolly Lolly寵物拯救隊》是Lolly Talk首次全員一起主持的電視節目，由8位成員（MeiMei、Sinnie、Yanny、阿蛋、Elka、Tania、阿妹、Ahyo）在節目內成為各項寵物護理專項的擔當，由新手飼養須知、日常護理、美容保健以至行為問題，全方位向專家學習，化身寵物拯救隊。
第二集今晚播出，Lolly Talk首先要幫一隻大唐狗「火龍果」沖涼，由飼養寵物經驗比較豐富的Tania和阿妹上陣。阿妹表現雀躍，更當正自己在髮型屋，一邊沖涼一邊同狗狗傾計：「火龍果小姐，呢個水溫O唔OK，你見邊到痕可以講喎」。狗狗非常乖巧，任得兩人全身按摩兼沖完一次又一次，不過就不停揈水，令阿妹與Tania由頭到腳都濕透。
Meimei、阿蛋、Sinnie、Elka就齊齊學煮飯，要餵飽過百隻狗狗，食材非常足料，有六袋雞胸、幾十隻雞蛋，拌上一大煲白飯及大袋狗糧，做法好簡單，只要眾人一齊將所有食材摵碎再混合即成。Meimei、阿蛋見到狗狗的食糧就笑指似足健身餐：「雞胸肉、雞蛋、飯，做女團要健身，所以大家同狗狗食差唔多嘢」。
第二集下半段由阿妹、Elka聯同貓貓訓練員，為一對主人解決貓貓行為問題。貓咪「小豹」原來好怕出街，見到主人拿出貓繩就已經怕得縮在角落。訓練員就教路進行「減敏訓練」，首先要將貓繩放在當眼處，令貓貓因習慣而減低抗拒，再用零食引誘貓貓親近貓繩。經過一輪嘗試後，貓咪小豹成功主動接觸貓繩，任務成功，Elka同阿妹兩位愛貓之人都好開心。
本身有養貓的阿妹又分享新手主人遛貓須知，「首先一定要幫貓貓打齊疫苗，第二要為目的地做足資料搜查，睇下當地有無野生、流浪動物、鼠餌。記得要小心唔好畀貓咪食到有害植物；如果貓咪未適應，可以帶佢地去無乜途人的地方。」
留言 0