仲有幾日就踏入蛇年，財政司前司長曾俊華就憶述當年與蛇住在同一屋簷下嘅經歷。佢憶述，2007年獲委任為財政司司長，由於位於南區嘅財政司司長官邸要簡單裝修，所以佢搬入去嘅時候，已經係秋冬時份。
當佢同家人入住後，負責管理官邸嘅同事就話，官邸花園出面平台下面有個蛇竇。曾俊華開頭聽到都有啲擔心，因為柴犬 Oliver仲好細，擔心佢出去玩嗰時，可能會被蛇咬。但同事就細心解釋，嗰啲蛇係官邸嘅「長期住客」，住咗喺度好多年，呢種蛇冇毒，唔咬人，只要唔好「打草驚蛇」，唔好搞佢，就可以和平共處。
曾俊華話，呢啲蛇精力充沛，一到秋天，雌蛇當埋官邸花園係產房，仲生番竇蛇仔蛇女。佢好鍾意坐喺花園嘅平台做嘢，所以不時都會見到蛇媽媽帶埋啲蛇仔蛇女「蛇」出嚟，曬下太陽；最多見到五六條蛇，大大細細，一齊出嚟嘆世界。佢話，見到啲蛇扭來扭去，都幾得意，後嚟更加見怪不怪，處之泰然，實行「佢有佢哋嘅生活，我有我嘅忙碌」。佢話，大家井水不犯河水，尊重對方原有嘅生活方式，世界就可以好太平、好美好。
原文刊登於 AM730
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)