樂仔教練最勁嘅地方並唔係跑步….
樂仔 (廖科樂)，年頭以52小時02分成為今屆「四徑」首位完成者，足以封神。最近佢成立咗自家跑會 ~「R33」，不少山友以至跑友均慕名而至。據講，33係佢毅然辭去多年穩定工作，決心跳出舒適圈全職開班授徒嘅年齡，所以跑會就叫「R33」，直率得嚟堅係型，同佢一樣。
「R33」最大特色係衝圈訓練以外，每堂會花大量時間作跑姿調整及針對改善跑步效率嘅訓練，由Butt Kick、提腿、摺腿、落腳點、前傾練習以至拉弓發力均一絲不苟，異常精準，盡顯細心。
誠然，作為一名elite跑手及教練，樂仔已接近隊穿天花板境界。(仲要靚仔，造物主竟不公至此 !)
但最令我折服嘅係，從過往訪問中得知，曾經一度長時間爛賭成性兼煙酒不離手嘅佢 (即MK仔啦)，竟因跑步而一夜覺醒，毫無懸念下跟所有惡習割席，繼而蛻變成近年最矚目嘅高階跑手。
回想自己讀書時候都有吸煙惡習，故深知戒煙不易，而我戒煙嘅方法同樂仔一樣 ~ 去跑步! 還記得處於未能完全戒甩但已參加跑班之初，每當衝斜路練習都幾近斷氣，辛苦得只剩半條人命且心跳差不多達至190…..當時心諗，點解自己體能差到咁，連女同學都幾乎跟唔上？因此，最後痛定思痛下定決心戒掉，對，係跑步幫咗我。
壞習慣之所以形成，主因日子耐咗，你同佢 friend 咗，繼而成為生活一部份，佢嘅存在變得理所當然，甚至被合理化。食煙，因為提神；飲酒，因為紓壓；賭錢，可以怡情……總之無咗佢就搞唔L掂。到底係跑步令人意志變得堅強，定係意志堅強嘅人先適合跑步？難以定斷。自問最初都係一位慢跑達人，但戒煙後，衝斜不再扯蝦，披醒由7分6分5分4分咁不斷邁進，嗰份強烈嘅成功感絕非粗口所能形容。由一個沉迷打機愛煲煙嘅廢青，進化成一個強而有力自信滿滿嘅跑者，我會為呢個新嘅自己而懶得戚大半天 (肯定又俾Peter話我懶醒)。
除咗比賽、攞獎、sub乜sub物之外，每個人都有權為跑步賦予獨特意義。對我嚟講，佢助我擊倒惡習、面對自己缺點、令身心變得堅強有火，快慢成績輸贏呢啲嘢，頓時顯得有點膚淺 !
從前認識嘅樂仔，口齒絕不算伶俐，有點不苟言笑，甚至俾人感覺不善辭令。
但呢次訪問中，士別三日，樂仔竟以一副口若懸河，有問必答且談笑自如嘅教練姿態出現，細問之下，事緣樂仔深知自身過於內儉嘅缺點而痛下苦功，閉關鑽研溝通及說話技巧，此舉實在令人拜服得五體投地，無怪乎「R33」嘅同學們都愛死呢位靚仔教練，觀乎其學生與日俱增已略知一二。
「R33」跑會以及「樂神」，身體力行且完美地示範咗點為之跳出舒適圈，仍安躺於圈內嘅您，why not run?
The post 尋找跑會的故事#03 | R33 appeared first on Fitz 運動平台.
留言 0