【搵食CONY】中環居酒屋高質爐端燒　首推肥美拖羅、和牛舌

港人工作壓力大，間唔中都會飲返兩杯放鬆一下。雖然CONY唔係特別好酒，但喺日式居酒屋嘅輕鬆氛圍下，都會不知不覺飲返少少。縱使居酒屋喺日本係平民恩物，越洋而來嘅文化和食材，加上昂貴嘅租金，令香港居酒屋嘅價位都偏中高，不過對識飲識食嘅港人而言，價錢係次要，質素先係重點！最近CONY為大家介紹嘅居酒屋「Kyoto Joe」於蘭桂芳開業逾20年，近日喺附近搬咗新舖，環境更舒適之餘，更多了爐端燒、天婦羅等選擇。

火紅演繹摩登日式風情

先講用餐環境，主打現代日本料理嘅Kyoto Joe今次以火紅色為設計主調，靈感來自京都傳統千本鳥居，並以摩登手法演繹，餐廳內的feature wall印上在日本文化中象徵好運嘅鯉魚，仲有落地玻璃可以遠眺海景。餐廳又設有可容納30人的VIP房，想一大班人開party或公司聚會就啱晒。

高質爐端燒

餐廳又新增爐端燒、天婦羅吧，當中燒爐由日本訂製到港，確保帶來真正嘅日本風味，而且爐端燒$30起，價錢相宜，CONY今次試咗燒牛舌、雞肉串、牛肋筋等，食材夠鮮味之餘，全部都火喉剛好，保存到肉汁，送酒一流。而天婦羅菜式亦有特色，好似「紫蘇炸蝦」用上加入了紫蘇葉調製而成嘅粉漿，食起來輕巧而且香氣獨特，帶出蝦嘅鮮甜。

其他推介

另外CONY亦推薦「佐賀和牛塔達」，經輕燒嘅佐賀和牛被逼出油脂，帶出肉香，連同用牛肋骨燜煮而成嘅肉汁炒香嘅本菇、京蔥和青椒一齊食，口感豐富，戳破中間的蛋黃拌勻同吃則更能增添香氣和滑溜口感。此外，日本菜不得不食刺身，餐廳每星期都會空運4至5次刺身到港，確保食材新鮮，CONY首推拖羅和牡丹蝦，均肥美新鮮。

至於「自家製鰻魚炒飯」亦係必食，本來CONY同朋友食其他已經好飽，都忍唔住爬咗成碗，除咗鰻魚燒得香滑，更值得一讚嘅係炒飯，佢加入咗酸瓜於米中同炒，中和鰻魚嘅膩感，而且粒粒分明，難怪係招牌菜。CONY仲特別欣賞餐廳有好多健康素食選擇，而且菜式有心思一啲都唔hea，好似秋葵腐皮卷，面層的腐皮燒得均勻香脆，加上秋葵嘅爽脆，口感別具層次。

新推早午餐無限暢飲

話明嚟居酒屋，drink list當然係重點，呢度亦夠多選擇，由大吟釀、米酒、紅白酒、威士忌、Highball、雞尾酒到無酒精雞尾酒一應俱全，調酒師亦會根據你嘅點餐提供不同配酒建議。7月餐廳仲推出「周六早午餐」，可以任食前菜、爐端燒、刺身、卷物等，再配一款主菜和甜品拼盤，加錢仲可以任飲不同酒品。無論放工後或周末想chill返下，呢間餐廳都能滿足你嘅願望。

Kyoto Joe周六早午餐
供應時間：逢周六中午12時至下午3時

價錢：

地址：中環德己立街30-36號蘭桂芳加州大廈23樓
電話：2804 6800