【返學喇】曝露年齡系列！紅A太空喼推經典復刻版　9月1日開始眾籌

「跌唔爛，踏唔扁，落雨唔怕淋濕，可以當櫈仔坐。」如果你聽過以上呢句slogan，唔好意思，你曝露咗你嘅年齡。雖然係咁，都唔需要覺得灰機嘅，呢段美好嘅集體回憶，相信你諗返起都會心微笑。呢個廣告背後的主角──紅A書喼，告別多年，竟然有機會重生，而它的命運就掌握在你手裡？

紅A（星光實業有限公司）是本地少數仍堅守在本地生產的香港品牌，主打膠製產品。雖然你未必知佢係邊個，但可能佢一直喺你身邊默默陪住你，望下你屋企個水桶、水盆、膠椅，可能都係紅A出品。

除咗水桶，70年代推出的紅A書喼可算是品牌另一個代表作。書喼又稱太空喼，既是書包又能做公事包，等車又可以變私家櫈，最緊要係耐用時髦，而且口號教人耳熟能詳，當時更賣幾十蚊一個，如果你擁有佢，係件好威水嘅事，簡直係身份象徵，所以當時個個學生都夢寐以求。不過時移勢易，紅A書喼早已停產，近乎消聲匿跡。

勢估唔到，紅A竟然會喺舊年冒起眾籌想法，推出復刻版書喼，而近日更加有消息指眾籌計劃即將喺9月1日於Kickstarter上線。話說因為製作書喼嘅模具一早冇咗，而齋計重新開發模具同材料費，成本已超過100萬港元。官方指如果能成功獲得啟動資金，保證太空喼會繼續堅持喺香港製造。

雖然話係復刻版，設計都要跟返時代步伐，書喼內加設咗可拆式電腦袋，可以放入15吋電腦、A4文件同其他文具，可以更有系統咁擺放文件、個人物品及雜物。至於物料方面，採用ABS一手塑膠原料製造，書喼更耐用堅硬，而且抗衝擊力更強。

大家都知香港製造買少見少，無辦法，大家都講求平靚正。暫時眾籌有四個方案，如果想支持兼買喼，最平$788，或者唔算好抵，但正正因為個個人都講求「抵」同「性價比」，「香港製造」呢四個字咪慢慢消失囉。又或者轉個角度諗，用錢買得返回憶，好似仲「抵」？