吳業坤婚禮甜蜜錫老婆 見到外父勁緊張

「坤哥」吳業坤上年5月突然在零預警下宣布同年少5歲的日本藝人濱口愛子結婚，而愛子仲嫁雞隨跟坤哥定居香港，做「香港媳婦」。結婚10個月，坤哥同太太昨日就在尖沙咀某酒店補擺婚禮，仲邀請一眾圈中好友如胡鴻鈞、鄭世豪、陳山聰、薛家燕、陳敏之、黃浩然夫婦等到場，就連無綫高層樂易玲都有現身祝賀。

參加完婚禮之後，一班好友都陸續在社交平台公開坤哥婚禮上的畫面，當日同坤哥老友鬼鬼的胡鴻鈞除了公開一張扮呷醋攬實新郎坤哥的搞笑合照，留言：「愛子，唔使咁緊張無人同你爭，坤哥，我淨係嚟一次下次唔好預我」，仲放了坤哥同愛子在婚宴上嘴對嘴sweet到爆的短片。

另外亦有好友公開坤哥在婚禮上，從外父手上接過太太的影片，片中見到坤哥非常緊張，仲乖乖聽外父話同有禮鞠躬。另一好兄弟謝東閔就表示見到坤哥結婚好感動：「睇住你長大，睇住你變壞 ，到而家變成一個大男孩 ，恭喜晒你兄弟！」