《跳躍生命線》自播出以嚟好評不斷，收視亦都突破咗30點，可以話係今年電視劇嘅佳作！
《跳躍生命線》主要係圍繞住救護人員嘅工作，表達生命無常。而上星期五嘅劇情發展到，「雄姐」同傑仔、六號一齊出勤時因為事發大廈崩塌而由二樓跌落地下，重傷不治。
雄姐嘅意外離世令觀眾大感悲傷，而劇中雄姐嘅一班好同事好兄弟亦都同樣係咁傷心。
尋日播出嗰集，傑仔因為內疚而非常痛苦，佢覺得如果唔係佢同雄姐調位，雄姐就唔會死。而郭子豪飾演嘅「六號」亦都好傷心，雖然表面平靜，但內心其實好痛苦。
十九集提到佢哋三兄弟踩單車嘅時候被「魯賓遜」叫停，原來係想佢哋幫手將跌落地嘅雀巢擺返上樹。
雀巢入面有3隻雀仔，樂於助人嘅佢哋毫不猶豫就用疊羅漢方式，由雄姐將個雀巢放返上樹。
然而，喺雄姐殉職之後，六號再經過嘅時候，發現嗰棵樹被圍起，仲有好多樹枝跌晒落地，六號衝入去想睇下雀巢有無事，點知就喺地下搵到翻轉咗嘅雀巢，而且入面嘅雀仔都唔見晒。六號見到此情此景，忍唔住痛哭失聲。
網民見到呢一幕，紛紛大讚郭子豪好戲，令觀眾睇到都覺得心翳。尤其係佢揼心口嘅動作更加表達咗佢有幾心痛，完全可以感受到佢嘅痛苦。
有網民認為佢喺《跳躍生命線》嘅演技明顯比之前嘅劇集有所進步。
而尋日嘅《跳躍生命線》，羅樂林飾演嘅聰叔講嘅一番話亦都非常有意義：「每個人一生中總會遇到生離死別，不過唔好冀望傷痛會離去。」雖然尋日成集都充滿悲傷氣氛，但係無常就係救護員嘅日常，所以要珍惜眼前人。
大家又有無俾郭子豪嘅演技感動到呢？
資料來源：連登討論區、Baby Kingdom
Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）
留言 0