《頭文字D》4K修復版首映 劉偉強憶日拍67組飛車鏡頭

電影《頭文字D》20周年，以4K修復杜比全景聲版重返大銀幕，並於前晚舉行首映，導演劉偉強、麥兆輝與一眾嘉賓出席，包括寰亞傳媒行政總裁林孝賢、電影配樂陳光榮、伍允龍、蔡穎恩、黃淑蔓、「小薯茄」的程人富與童童等。現場設有「藤原豆腐店」及「AE86」打卡位，更有多位車迷駕駛AE86到場支持，泊滿停車場。

兩位導演在首映上分享拍攝趣事，劉偉強笑言「我係周杰倫」，又表示20年來最大改變是與麥兆輝「交換身材」。麥兆輝哭笑不得︰「人哋問你當時辛唔辛苦呀？大家知道點解唔拍續集啦﹗」劉偉強解釋︰「因為版權問題，無法開拍第2集。正如麥兆輝話，好嘢，一部就夠。」麥兆輝稱當時集合了很好的團隊，花了40幾個工作天完成拍攝。劉偉強笑道：「唔怪之我當時日日都覺得好攰，佢話我一日拍67組飛車鏡頭，大家都搵命搏。」麥兆輝說：「如果劉太喺度，一定唔畀拍！」

映後全場掌聲，兩位導演再上台分享，麥兆輝說：「雖然我睇咗好多次，但今次嘅聲效完全唔同，立體感好強，我好激動！依家香港電影市道係差咗啲，但最緊要都係製作。我、劉偉強同埋成個團隊，希望延續落去。」劉偉強說：「我睇完之後覺得自己好厲害，我個仔坐隔籬，佢讀電影，佢話好正，我話：『梗係啦，我拍㗎喎！』有啲效果20年前出唔到，今次有機會修復，拍攝角度、聲效、陳光榮嘅音樂、特技再次呈現，唔似20年前拍嘅戲。今日感覺好似20年前第一次上映咁開心！」他寄望《頭文字D》吸引觀眾，再掀起入戲院睇戲的熱潮。

（即時娛樂）