跑步與人：Sing Sing

1. 跑步年資？為什麼開始跑步？
資歷好淺，真正開始跑步大約一年多時間！記得係 2020 年尾一次身體檢查，突然發現身體出現問題，要盡快做手術。當時個腦一片空白，原來人生我仲有好多嘢未做同想做。以前淨係識得吃喝玩樂，今次執返條命，好感恩個天俾呢次經歷我去成長，要好好珍惜時間同生命，亦知道健康有幾重要。

身體慢慢康復就開始跟朋友行下山、做下運動。喺 2022 年中見到人跑步，又好羨慕人地可以跑到全馬。既然世事無常，就咩都試下啦！對於以前零運動嘅我，開始時係好吃力，本身又有哮喘底，氣管差，跑到上氣唔接下氣，試過無數次同自己講「算吧啦！你跑唔到㗎啦！咁辛苦為乜啫？」但係不停鼓勵自己唔好放棄，更難捱嘅事都捱得過，任何事要付出先有收穫！

就係咁，由 1k、2k 再 3k 慢慢跑出嚟…過程雖然辛苦，但係每次跑到同跑完都俾到自己好大滿足感。直到今日，跑步已經成為咗我嘅生活習慣。

2. 有沒有跟跑會或教練跑？選擇原因？之前經朋友介紹跟過 Trailblazer 黃啟樂教練。初初咩都唔識，淨係識得死跑難跑，腳痛仲死頂去上堂，跟住就拉傷咗韌帶，之後停咗幾個月冇跑。好返之後工作量又大增，好難夾到時間上堂，現時唯有自修。

3. 日常跑步路線？
因為住港島區，所以多數會去跑馬地馬埸、寶雲道同中環碼頭。有時亦會跟朋友去試下唔同嘅路線。

4. 喜歡什麼時段跑步（晏跑/晚跑）？為什麼？比較喜歡日間跑步。以前生活習慣日夜顛倒，而家盡量早睡早起。最明顯個人健康咗同精神咗。而夜晚跑完可能太興奮，會搞到瞓唔着…Hahaaaaaa！

5. 除了跑步，有沒有做交叉訓練？（例如舉重/游泳/瑜伽）對跑步有沒有幫助？今年太忙，一有時間就去咗跑步，rest day 就會游水同拉筋，始終對跑步都有幫助，唔會咁容易受傷。

6. 喜歡跑山還是路跑？兩樣都好鍾意！跑山可以睇埋風景，打下卡。原來香港有好多地方我之前都未去過。而跑步可以訓練自己嘅耐力同堅持！

7. 有沒有因為跑步而放棄了其他運動？當然有！因為興趣太多，之前熱愛嘅水上運動今年都冇玩過。為咗跑步就連同屋企人、朋友相處嘅時間都少咗…

8. 有沒有跑步偶像？原因？世界級一定係 Eliud Kipchoge！但係我覺得每一位跑者都值得尊重同敬佩！因為跑步從來都唔係一件容易嘅事，每位跑者都有付出過佢哋嘅努力同汗水！

9. 未來有什麼比賽？現時跑步目標是什麼？嚟緊 9 月中會去 Sydney 跑半馬，同埋 12 月去台北跑全馬。希望可以順利無痛完成我嘅初馬啦！畢竟年頭有過傷患，自己亦係第一次跑全馬；但係每一次比賽都會叫自己盡力去做同埋好好享受過程。

10. 最想到外國哪裏跑步或者馬拉松？如果跑馬拉松首選一定係東京，係情意結，加上因為工作經常成日要飛去唔同嘅城市，所以都有幸可以飛到邊、跑到邊。

11. 跑步途中會想什麼？主要都係專注自己嘅呼吸同跑姿！有時都會諗吓跑完之後食咩好，跑得咁辛苦喎，一定要好好獎勵吓自己啦！

12. 最喜歡的跑步用品品牌？最喜歡一對跑鞋Nike，因為款式多、顏色靚。同埋覺得比較適合自己腳形。

13. 有什麼社交媒體可以找到你？IG: singsing.hiking_running

Please follow Insports Hub on Facebook & Instagram
https://insports-hub.com/
FB
https://www.facebook.com/insportshub
IG
https://www.instagram.com/insportshub/