周吉佩搵張衞健集郵　4歲就與偶像合照珍貴出土

《中年好聲音》冠軍周吉佩（吉吉）近日於慈善活動中與前輩張衞健（Dicky）碰面，吉吉把握機會集郵，事後更公開合照，並主動為8月份舉行的BIG FOUR演唱會打氣。及後他再於社交平台上載自己4歲時與Dicky的合照，可見二人緣分深厚﹗吉吉更搞笑留言：「有冇記者朋友幫我send（相）畀佢？」

照片中的吉吉長相輪廓與現在分別不大，滿臉笑意站在Dicky身邊且毫不劫場，原來早已「天生一副明星相」。談到這張合照的由來，他笑說：「當年我媽咪帶住我，喺商場同佢偶遇，即刻向佢要求影相。其實以前同佢做嘢，都有攞過張相畀佢睇，大家仲笑咗出嚟，點知後來張相唔見咗，最近我花咗好多氣力先搵得番咋。」

吉吉自言小時候很喜歡追睇劇集《西遊記》：「真係估唔到大個咗我因為負責演唱電影《奪標》主題曲，有幸同Dicky哥哥去內地唔同地方宣傳，嗰時佢已經好照顧其他人喇，嗰日喺電視城接番，佢仲認得我，又送祝福又叫我加油。仲得意係依家輪到我個仔煲《西遊記》，佢知道我會見到Dicky哥哥，就千叮萬囑叫我一定要影合照，又追問我點解識得佢偶像喎。」

東網網站 : https://on.cc/東網Facebook專頁 : https://www.facebook.com/onccnews/