娛圈單打︱忽然傳拍真人騷　唔通女神蜜運中

有傳李施嬅將與舊愛參與內地真人騷，隨時破鏡重圓。

吓，分手又翻撻，仲要做戲咁做，唔係咁兒戲啩？嗱，今年2月宣布跟訂婚4年、拍拖8年嘅健身教練未婚夫分手嘅李施嬅，近日盛傳將偕舊愛一齊參演內地真人騷。節目以面臨感情危機嘅夫妻或情侶為主角，藉着多日旅程再次互相了解，睇吓有冇復合機會。咦，如果消息屬實，咁咪表示二人隨時破鏡重圓？

李施嬅不嬲係好戲之人，亦頗具觀眾緣，兩年前跟阿佘合作《新聞女王》，黑化演技出色，視后大獎飲恨，只能說時也命也。之後施嬅專注內地發展，先後參與拍攝內地劇集，同埋完成《新聞女王2》。唔通趁住依家有空檔，因此接受真人騷邀請？

話說呢個真人騷《再見愛人》已拍咗4輯，叫好叫座，之前綠葉王艾威，亦曾偕同前妻拍攝呢個節目，大家打開心扉真情剖白，成功挽救婚姻並復合，好多觀眾都話睇得好感動，可惜前妻最終不敵肝病離世。若然今次施嬅真係首肯，同前未婚夫一齊登上節目，唔止夠晒噱頭，仲分分鐘有喜訊公布添。

你知啦，若然再見不是朋友，根本冇可能再見面，遑論出騷。拍得真人騷，朝見口、晚見面，肯定本身已經有啲嘢，或者已經復合，再藉着真人騷增進感情，兼有錢落袋。否則，以施嬅對感情事向來低調嘅態度，點可能將私事公諸於眾？所以啫，一係唔拍，一旦落實拍攝，意味隨時嫁得！

點都好，施嬅早屆適婚年齡，人又靚女，個性又溫柔，做戲又好，大家都想佢有個好歸宿。當然，作為觀眾，除咗想睇內地真人騷，更加想睇佢喺香港嘅演出，拜託《新聞女王2》快啲開播啦！

娛樂