全新「反白眼」Memoji曝光！iOS 13.4更新將加入「嬲到噴煙」、「O嘴」等生動表情～

對於Apple Fans嚟講，最關注嘅除咗新產品上市外，當然仲有系統更新嗰陣有咩新功能推出啦！Apple稍早前發佈消息，宣佈2020年3月嘅iOS 13.4更新將會新增全新9個生動嘅Memoji，當中包括「反白眼」、「嬲到噴煙」、「O嘴」等表情，好笑又盞鬼！令你可以更加傳神咁去表達生活中嘅唔同情感～

稍早前宣佈嘅 iOS 13.4 更新將會增加全新 Memoji！包括：「反白眼」、「嬲到噴煙」、「許願」、「嚇到O嘴」、「使用電腦中」、「被愛」、「拒絕手勢」、「伸手」同「派對慶祝」。

其實除咗Emoji可以表達情緒之外，Memoji都做到呢個功能，仲可以製作出獨一無二嘅專屬表情添！大家可以根據自己樣貌，製作出同自己好似樣嘅 Memoji。喺傳送訊息嘅時候就可以將自己個樣同埋情緒100%咁呈現喺對方眼前～

另外，Apple 為 iPhone 同 iPad 推出嘅免費影片創作 app 「奇趣拍」亦有更新，「奇趣拍」備有幾十種濾鏡、動畫貼圖同全螢幕動畫海報可供選用。呢個 app 同時亦包含超過 60 個原聲帶音樂，並可根據影片長度自動加以調整匹配。

用戶可以發揮個人創意，用 Memoji 同 Animoji 角色進行創作，將Memoji 同 Animoji 加入個人化影片訊息、幻燈片、課堂創作、迷你電影等，為創作加上個人特色點綴。Memoji 同 Animoji 可以跟住用戶嘅面部動作，運用 iPhone 同 iPad 上嘅前置相機嚟拍攝有趣嘅自拍影片。