直擊半百凍齡梁琤掃性感晚裝 北上挖金單身自強

92年在電影《黑貓》演性感女特工脫穎而出的梁琤，轉眼入行廿八年，樣貌、身材同樣保鮮，剛度過51歲生日的她，顏值超班，雖然至今愛情交白卷，不過梁琤對感情不強求，堅持單身自強。早前，她一個人現身尖沙咀掃性感晚裝，高清鏡頭下皮膚嫩滑零瑕疵，連試多套性感晚裝身形fit爆，難怪近日轉攻國內的她，深受內地網民歡迎，被網民大讚是凍齡美女，工作長做長有！

撰文、圖片：東方新地

梁琤無綫告別作《唐人街》被抽起

近年手機 Apps層出不窮，滿面皺紋都可變美少女，個個化身蛇精，不過真面目見得人冇幾個？現年51歲的梁琤，卻凍齡有法，完全不用後天加工及靠新科技補飛。去年拍攝電影《不義之戰》演特擊隊Madam的梁琤拳腳真功夫夠吸睛外，凍齡樣貌亦令人驚嘆，身手和身材絕不遜於新一代同戲拍檔何珮瑜、林明禎；今年一月約滿無綫的她，在無綫告別作《唐人街》亦有不少動作場面，令人充滿期待，不過劇集臨時被抽起至今播映無期，觀眾惟有繼續等。

半百凍齡梁琤試低胸戰衣

早前難得返港的梁琤，一個人到尖沙咀晚裝店掃性感晚裝，相信是為演出作準備，當日化上淡妝戴著黑框眼鏡的她，無懼高清鏡頭挑機，真面目零走樣，步入店內已急不及待揀晚裝拼埋身，身材有料的她，攞上手的戰衣件件都是超低胸，拼完一輪再入試身室逐件穿上身，又同店員傾個不停，試身一個多小時，揀啱心水的梁琤再交帶店員幫她修改尺寸，她便匆匆趕著離開，相信還有下場節目。

堅持每日運動兩小時

打足廿八年梁琤心中團火依然熾熱，她不諱言，每次去到片場拍動作戲都會充滿力量，拍攝《不義之戰》及《唐人街》，她為演出亦下了不少功夫！為了保持矯捷身手，梁琤堅持每日運動兩小時，近年她更愛上玩空中瑜伽，勤力和毅力成就她身形樣貌三十年不變。據知情者透露：「其實喺拍《黑貓》之前，Jade（梁琤）根本冇功夫底，只係特訓幾日就開始拍，不過佢身手靈活，加上領悟力高又有天份，睇武指做一次已經好快上手，雖然拍咗咁多年打戲，但為求進步，依家佢仲會上網研究其他人嘅動作戲再揣摩，拍動作場面控制同掌握比以前仲好咗，所以到依家 Jade都好鍾意拍動作戲，為咗鍛鍊身手同埋保持狀態，佢堅持每日做好多運動，就算開工都會攝時間拉筋、耍太極，近年仲愛上玩空中瑜伽，愈玩愈上癮，個個星期都上堂，試玩好多高難度動作，所以佢身體一啲贅肉都冇，身材同樣貌同以前分別唔大！」

轉攻內地受歡迎

憑藉電影《黑貓》的性感硬朗打女身手，及早年在無綫拍攝的劇集《金枝慾孽》、《巨輪2 》，梁琤演出早已深受內地觀眾喜愛，近月約滿無綫後她全力轉攻內地，凍齡樣貌令她工作不斷，近期她更活躍微博，不停更新個人近況，同內地網民保持互動勁吸人仔，除了被邀拍攝內地護膚護髮廣告，參與商業活動，近期更拍攝內地直播綜藝節目《報名點》，與多位年輕女星李彩華、於易洲拍埋一樣唔輸蝕。

家人支持感幸福

永不言休努力衝擊事業，不過入行多年鮮有傳出緋聞的她，至今仍然單身，雖然也曾有個結婚憧憬，不過梁琤自言隨遇而安，不會強求愛情。坦言宅女性格，從小到大都家人第一，不用工作便會陪家人、朋友及做運動，即使沒有愛情，有家人支持已經好幸福。事實上，身為家中長女的她的確非常孝順，加入無綫先後憑《烈火雄心》、《金枝慾孽》入屋開始上位，梁琤卻因父親患癌在05年甘為照顧病父息影六年，雖然梁父11年最終不敵癌魔離世，梁琤亦未有後悔為父退下火線，反更珍惜陪媽媽的時間，努力賺錢供四個弟妹升學和生活，以至擔起家中一切開支，梁琤就連跟外甥關係亦非常要好。