程人富加拿大熱點影婚照　「車飛難搶過香港演唱會」

YouTube頻道「小薯茄」開國功臣之一，34歲的程人富（原名：程仁富），自去年向拍拖逾11年的女朋友求婚成功後，便馬不停蹄籌備婚事，早前便放一個長假到加拿大影婚照，更被Finally三位隊友作歌Dis佢。講咗咁耐，繼公開過大禮的超豪場面後，輪到公開結婚照，原來富哥與未婚妻去到加拿大一個國家公園Banff影，當中有山景、冰川景及湖泊景，由於風景靚絕，是戶外活動熱點，其中前往Moraine Lake的巴士飛仲難搶過香港演唱會飛。

即將成為人夫的程人富，日前完成過大禮儀式，起龐大的聘禮陣容，閃閃發光的金器放滿全檯，非常跨張。而日前，就輪到放閃婚紗照，據富哥在社交平台表示，二人是去到加拿大的Banff影。「原本想喺呢度求婚，但因為天氣問題做唔到，所以決定一定要喺呢度影婚紗相，仲要去到埋Moraine Lake，淨係可以搭Shuttle Bus上去，啲Shuttle Bus嘅車飛係難搶過香港啲演唱會。上到去真係會靚到『嘩』出嚟，人生真係要去一次。」

而昨日，富哥更開始派帖，首批獲派紅色炸彈的，當然是小薯茄一眾兄弟姐妹，而一直未有公告婚期的他，在童童出帖文時不小心洩露，原來揀了12月25日聖誕節擺酒，夠晒喜慶。