林日曦梁祖堯首合作 《大反枱日》明年登場

林日曦繼《大辭職日》、《大MK日》、《大初戀日》及《大離婚日》後，宣布推出年度瘋狂喜劇作品《大反枱日》，並邀請梁祖堯（阿祖）參與演出，攜手上演一場反枱反櫈的荒誕鬧劇。

林日曦前年曾於日本參加世界反枱大賽，當時飲恨只得「梗頸四」，卻因此激發創作靈感，創作出《大反枱日》劇本，他笑道：「喺日本參加完世界反枱大賽之後萌生呢個念頭，雖然我只係攞到第4名，畀3個日本人贏咗，不過佢哋只係個紀錄遠過我，氣勢麻麻哋。我覺得香港人先係全世界最適合反枱嘅人，隨街都見到啲人鬧交反面，大家都好好火。」至於今次為何「挑機」邀請梁祖堯？林日曦語帶調侃：「因為覺得佢紅，想叨佢光，同埋偷佢粉絲。」

梁祖堯表示看過林日曦所有作品，《林日曦細聲講悲但真》最令他難忘。他興奮表示：「一直都好想同佢合作，唔係客套說話，係真心嘅。人生去到呢個階段，好想同多啲自己欣賞嘅人合作，睇吓擦到啲咩火花出嚟，又可以刺激創作，開闊眼界，所以收到邀請嗰刻，真係好驚喜，好開心！」 他更盛讚林日曦的筆觸獨特，由他設計的笑位絕非一般笑位。他說：「佢成日話自己內向、怕醜又有反社會人格，但其實佢內心同講出嚟嘅嘢都係一個暖男，會融化你，呢個反差好有趣。」

雖然初次合作，梁祖堯已從白只、韋羅莎、胡麗英等好友口中聽過不少林日曦的事。他表示：「佢哋成日話佢要求高，但同時不停強調佢其實係冇嘢嘅，係好人嚟，唔好驚佢，反而搞到我有少少淆底。當身邊朋友好大力咁講佢係好人，我就會諗，如果真係好人，其實大家唔使咁用力解釋，好似有啲暗湧，所以開頭我都驚驚哋。」他坦言會以觀望態度迎接排練，希望先把自己本分做好。梁祖堯續說︰「其實真正嘅我都好怕醜、被動，雖然講都冇人信，咁所以同林日曦合作，我可以舒服啲，唔使太用力、太主動，由佢順其自然慢慢發生。」

梁祖堯亦分享了早前到日本拍攝時的一段趣事，當時他與胡麗英及監製3人同行，帶同大量道具上機，包括大量假金鏈、金牌以及一些仿真的食物。雖然金器全屬假貨，但始終是金屬，重量不輕，3人只好分別放在手提行李上機。當填寫入境申報表時，監製疑惑是否需要申報「攜帶黃金」。阿祖笑着憶述：「當時引申出另一個擔憂，我哋會唔會被誤會帶住啲假金器入境日本作非法用途呢？萬一所有道具被扣查，咁就拍唔成，都唔知點算。」幸好最後只是虛驚一場。

談到劇目特色，梁祖堯形容《大反枱日》特別適合全香港人，尤其是身心受壓抑的一群。他說：「其實我都好想反枱，但現實唔係吓吓都可以話反就反，但係喺呢部舞台劇入面，就可以將你反枱嘅慾望完全發揮到極致，話反就反，尤其是林日曦係個反枱專家同反枱運動員，反枱嘅情節係會喺戲裏面不停持續地出現，所以特別適合身心受到壓抑嘅觀眾朋友入場觀賞，等我哋幫你反枱紓壓。」

舞台劇《大反枱日》將於明年1月23日起，一連21場假香港演藝學院歌劇院公演，門票將於明天（26日）上午9時起公開發售。

（即時娛樂）