魏浚笙患蕁麻疹紅斑遍佈全身︰唞唔到氣

魏浚笙（Jeffrey）向來擁有良好膚質，令人羨慕。原來他長年受濕疹困擾，近日更不幸患上蕁麻疹，臉頰及全身佈滿紅斑，痕癢難耐。Jeffrey昨天（19日）清晨近5時在社交平台透露︰「突然痕醒，起身照鏡身上面一撻撻紅晒仲上埋面，食咗過敏藥、搽埋類固醇，希望瞓得著，起身會退晒，聽日仲要開工。濕疹人的煩惱 就係咩都無做唔知咩原因會trigger 到……」個多小時後，他再出Post表示確認患上蕁麻疹。

昨天傍晚，Jeffrey上載背脊佈滿紅斑及抓痕的照片，他說︰「天生濕疹底，人生都經歷過幾次大大小小嘅蕁麻疹，今次係我最難受嘅一次，原本以為係普通敏感，諗住食完抗敏藥就無事，反而控制唔到之餘個身同塊面仲愈出愈多，去到一發不可收拾嘅地步，痕到你瞓唔到覺，又腫，仲唞唔到氣，幾年前個種無力感又重現一次。今日要開工，成班crew特登外地飛嚟香港，可以頂到都唔想影響到大家工作安排。」

Jeffrey續說︰「好彩，喺我絕望之際搵到之前喺日本買落嘅藥膏同埋藥，真係救咗我一命，食咗一粒、搽咗半支瞓咗幾個鐘，起身幸運地已經退咗一半紅，起碼冇咁痕已經好感恩，希望食晒之前可以完全好番。今次出一出疹，前面同塊面就唔影啦，實在太恐怖。個範圍大到一晚冇咗半支藥膏，希望之後喺香港都買得到。緊急情況嚟講真係已經好work，希望都幫到同我一樣情況嘅人，我見大家都有留言好多唔同方法，我自己都會儲備定，Touchwood將來有需要都可以有幾種方法係手用。Thank you so much, threads友有愛﹗」

（即時娛樂）