張敬軒「女仔講粗口論」惹火頭　虛心承認失言獲讚

歌手張敬軒日前因大讚某冰室的「菠蘿包」好吃而引起網上罵戰，徹夜與粉絲開火，昨日出席活動時被問及此事，他坦言自己為人傳統、唔鍾意女仔講粗口，又開玩笑指粉絲「嘰嘰趷趷高矮肥瘦」，豈料言論再引起網民討論，事件持續發酵。有網民指出張敬軒此言疑性別定型，表明：「女仔唔一定要斯文」、「女仔講粗口都唔代表有問題」。

而張敬軒昨晚亦再度發文，指深思熟慮後自覺言論的確有不妥：「我都覺得今日我嘅呢番說話唔恰當、有偏頗，亦都唔應該錯誤為當代女性life style 嘅自由選擇貼上咗標籤，我覺得十分抱歉」，他又解釋當時全段說話內容，是指有粉絲用他的照片作為社交網頭像，故不想粉絲使用過激的態度或措詞，希望大家以和為貴。他續指身邊不乏格爽朗、直話直說的女性朋友，認同不應標籤女性：「喺我嘅思想當中，係有一定嘅80年代長大嘅人嘅固有思維，當然亦都有相對傳統嘅部分，但係無可否認嘅係時代喺度變緊，社會嘅意識形態亦都一路喺度變化緊，我哋唔應該再用性別去作為任何傳統道德衡量嘅指標，係呢一點上面，我係絕對贊同同埋需要捍衞嘅」，又笑言自己近日好「惹火」。

網民對於他大方承認失言都表示接受，亦有人為他平反，指他向來心地善良對陌生人也充滿關懷，認為不應因單單一句說話而完全否定其為人。

東網網站 : https://on.cc/東網Facebook專頁 : https://www.facebook.com/onccnews/