曾俊華盧冠廷原來是band友　七十年代波士頓組「浪子樂隊」結緣

盧冠廷（阿Lo）一連兩場演唱會昨晚（21日）於紅館開鑼，他早已表明這是他最後一次的紅館演出，個唱首場星光熠熠，多位圈中好友如俞琤、陳志雲、谷德昭、陳潔靈、張婉婷等人親臨支持，其中亦包括前財政司長曾俊華，今日在Facebook發文自爆，原來他是盧冠廷的band友，早於七十年代因為「浪子樂隊」結緣至今。

曾俊華今日上載自己到紅館入場欣賞盧冠廷演唱會及到後台與對方合照的相片，寫道：「我同盧冠廷早喺七十年代結緣。阿Lo嘅爸爸盧海天係粵劇名伶，後期移居波士頓，而當年同我一齊組成『浪子樂隊』Sojourners嘅兩位band 友Teddy同Alex兩兄弟，佢哋嘅爸爸尹自重，係廣東音樂「四大天王」之一。憑住呢個廣東音樂嘅連結，因緣制會，令我同阿Lo喺Boston唐人街附近首次碰面。」

曾俊華提到，自己在八十年代初回流香港。「阿Lo喺呢個時候，亦推出佢第一隻個人專輯《天鳥》，自此我就成為佢嘅標準歌迷。我喜歡阿Lo，因為佢嘅歌曲風格好別樹一幟，同其他歌手好唔同，而佢太太唐書琛幫佢填嘅詞，都係寫出佢嘅心裡話。」他又直言聽很多對方的歌，最喜歡「愛」系列作品，包括為電影《西遊記之仙履奇緣》所寫的插曲《一生所愛》。「講一段 500 年都冇辦法修成正果嘅愛情，真係聽到毛管戙。」

曾俊華透露上星期到了寧夏銀川，其中最期待的行程，就是去當地鎮北堡西部影視城。「因為嗰度就係片尾，跟至尊寶同紫霞仙子生得一模一樣嘅男女，喺度爭持嘅城樓所在地。去到現場，見到影城擺放咗周星馳同朱茵公仔喺度，當刻我一邊喺腦入面哼《一生所愛》，一邊努力投入嗰場戲嘅意境，可惜最後失敗收場！冇計，可能兩個公仔實在太假，現場又太多遊客。」

除了《一生所愛》，曾俊華又喜歡電影《最愛》主題曲《最愛是誰》。「只要一響起旋律，我就會諗起電影嘅故事，同兩位最有韻味嘅女主角張艾嘉同繆騫人。」但曾俊華的至愛，卻是《憑著愛》。「當年我仲引用其中一句歌詞『曾踏遍刺腳的彎路』嚟鼓勵香港人，我覺得呢一句，到今時今日都仲係好中。由九十年代起，每次阿Lo嘅紅館show我都有入場，我尤其喜歡聽佢一個人，拎住支結他，自彈自唱，有時唱得好有feel。」

曾俊華上載自己在後台與盧冠廷的合照，他分享：「雖然好多年都未碰過頭，但係佢睇嚟仲係好fit，好健康，希望佢可以繼續做靚音樂俾我哋欣賞。」他又提到，Encore前最後一首歌《陪着你走》，覺得對方的歌聲將觀眾的情緒帶到頂點。「今次嘅表演，絕對係一個令人難忘嘅音樂會，我自己喺期間都感動咗好多次。」他又直言：「希望呢次唔係最後一次啦。」