《茶是故鄉濃》深夜重播　林家棟因一個理由唔返TVB

藝人林家棟今日（12日）出席apm舉行的當代藝術家上野陽介作品展覽，現場他對造型可愛的手辦公仔愛不釋手，他自爆喜歡卡通片《小甜甜》，由細看到大，甚至會看到喊，不過怕講出來被人取笑。問到有否遇過像「小甜甜」般可愛的女生？他自嘲：「冇，有就唔會咁，夢想同現實係有距離，我想大會送個公仔畀我，因為唔想間屋咁寡。（你有冇收藏公仔？）冇，我中學時儲唱片同日本模型車。」他謂想跟上野陽介合作拍動畫電影，因現時可借助AI技術創作，相信會受年輕人歡迎。

另外，家棟最近一直忙寫劇本，問到進展，他坦言：「講起就頭痕，成日對住電腦，眼壓都重咗，總之搵食艱難。」他透露最近有投資者找他拍攝8至10集的短劇，自己負責監製及策劃，會找心儀的導演合作，談到近期戲院相繼結業，但同時有投資者接手？他認為是好事：「做咗咁多年，停一停都好正常，依家係重新出發。作為電影人，我哋要做好自己先，有好嘅電影自然有觀眾入場。」

提到家棟多年前主演的無綫劇《茶是故鄉濃》近日在深夜重播，他笑言家中電視機壞了，故未有收看，他憶述當年在貴州拍攝好辛苦：「嗰次係我第一次返內地拍劇，當時唔似依家交通咁發達，要坐十幾個鐘車，有咗真係唔好坐，否則個B都『櫈』埋出嚟。」雖然辛苦，但他有感劇集受觀眾喜歡，加上帶動當地旅遊業，自己也算無憾，問他會否再拍無綫劇，他直言：「唔好喇！（有冇搵過你？）以前搵過，不過唔好喇，唔係怕辛苦，係想專心做電影。」

東網網站 : https://on.cc/東網Facebook專頁 : https://www.facebook.com/onccnews/