古天樂日本出碟震撼樂壇　3月上架盛惠逾600蚊

《尋秦記》電影版火熱程度席捲全亞洲！當中主角之一嘅古天樂跑勻中、港兩地做宣傳，原來佢喺日本嘅人氣亦不能小覷，古天樂宣布其一張新曲加精選唱片將於3月於日本上架，註明係限量碟，入面有齊和林峯合唱新版《尋秦記》主題曲《天命最高》，亦有經典金曲如《男朋友》、《今期流行》、《像我這一種男人》等。

呢隻「Back To The Past」精選唱片，將於日本3月6日出售，當中分CD及黑膠兩款售賣，CD價錢為7,090日元（約353港元），而黑膠則賣12,290日元（約611港元）。唱片封面設計甚有格調，以深紅色為底色，古天樂則以黑色皮褸晒出模糊側面，簡單又型爆。曲目方面，除合唱版《天命最高》及數首Hit歌外，又有同謝安琪合唱嘅《(一個男人) 一個女人和浴室》、同古巨基翻唱張國榮嘅《當年情》，加埋舊歌《天真》、《Mr. Cool》同《吻得到 愛不到》，搞到古天樂嘅香港粉絲都勁期待，已經求定偶像最好開埋簽唱會，大叫古天樂做「愛豆（Idol諧音）」，不過最想都係香港遲吓都可以有得賣。

東網網站 : https://on.cc/東網Facebook專頁 : https://www.facebook.com/onccnews/