觸電｜ANSONBEAN謝票槍指觀眾搞氣氛 柯煒林撳「靜音掣」叫停

港產勵志電影《觸電》台前幕後戲裏戲外發揮「Happy Hour」團結精神，四出謝票及出席活動，導演梁國輝、林敏驄、陳穎欣（Yanny）、ANSONBEAN、李玗蓁、梁雋彥及視覺特效指導梁仲文，前日（21日）去到長沙灣出席VR遊戲活動，與《觸電》觀眾體驗虛擬實境射擊遊戲，眾人玩得投入，林敏驄笑言：「非常好玩，我都隊冧咗5、6件。我係第一次玩VR game。」當被Yanny問及遊戲一開始時有沒有頭暈，林敏驄搞笑回應「有頭痕」。Yanny說：「遊戲剛開始時我枝槍射唔出，好嬲，如果唔係贏嘅一定係我。不過真係好逼真，高位唔敢行。」

一身戲中造型的ANSONBEAN說：「我冇試過玩得咁開心，出咁多汗，係咁跌槍。」ANSONBEAN被林敏驄指大汗得似冲涼，ANSONBEAN說：「我都唔知點解，原來着羽絨真係好熱。」林敏驄嘲笑說：「都懵懵哋，着件羽絨出嚟。」李玗蓁說：「我被人隊冧咗好多次，但係好好玩，好投入。」梁雋彥說：「我係咁冧。」

於剛過去的周末，《觸電》團隊在2日內出席謝票，包括林敏驄、柯煒林、Yanny、ANSONBEAN、蘇皓兒、吳肇軒等，大家力撐《觸電》。Will表示：「戲入面所有電競，我都係呢部戲先開始學，戲中追求真實性，所以請到電競選手教我哋，唔使做嘢嘅時候就打機。」

飾演柯煒林電競世界化身的ANSONBEAN，以一身戲中角色造型亮相，更手持道具手槍，誠意十足，而他亦非常入戲，分享時用槍指向觀眾大搞氣氛，Chloe見狀即笑住叫柯煒林按下「靜音掣」去叫停他，非常搞笑。

（即時娛樂）