無綫回應張潤衡指控《真相猜‧情‧尋》︰一向秉持真實報道

無綫新聞資訊節目《真相猜‧情‧尋》探討「八仙嶺山火之謎」，團隊在節目中表示一直被外界質疑曾在山上吸煙的張潤衡原答應受訪，但最終拒絕。方東昇在節目尾聲旁白中，說︰「如果我哋搵到答案，但無汲取教訓，歷史遲早重演，悲劇只會再臨，到時或者會真正應驗一句話：真相，畀你搵到又點呢？」其中「真相，畀你搵到又點呢？」是張潤衡多年前受訪曾說的。節目播出後激起不少網民討論及在張潤衡的社交平台留言，要求他交代山火真相及質疑他為何不受訪。

張潤衡昨天（3日）在社交網以長文回應網民︰「其實嗰句說話我係被網絡cap圖出嚟斷章取義。我真係唔明啲乜嘢面對傳媒對答問題，我唔係一個受過公關訓練嘅公眾人物。嗰陣時個訪問問我想唔想知道真相，我嗰一刻個腦都好混亂。你想我點答？（首先，係你哋認定係我做，但係我亦都確實話俾你聽嗰個唔係我）山火發生嗰陣，其實我係坐咗喺度玩game boy ，聽到老師叫我走，我就即刻走。我點樣知真相？我都唔知真相，我點樣回答？最近都有傳媒Cap番嗰陣時我講成段嘅說話，你鍾意嘅可以自己睇番，我淨係知道我人生入面唔係剩係得一段創傷，我仲有好多責任，所以我自己已經唔想再回望過去。我唔會睇佢呢個節目，呢個節目本身就係出於極唔尊重嘅情況發生。有好多鏡頭以外嘅嘢你哋唔知，正如我從來都冇應承過佢哋接受訪問，佢就夾硬喺個節目度話我應承咗佢。事實係嗰個李嘉嘉一開始打電話俾我，我已經拒絕咗。佢要約我傾幾句，得，我就約咗佢諗住傾幾句。點知佢帶晒成對人過嚟，完全事前冇通知過我。呢啲嘢你哋又知咩？OK，我照同佢哋講我嘅諗法，我亦都有同佢哋講清楚關於大家成日話我講嗰句『真相…』嘅說話，亦都叫佢查清楚，睇番條影片我想表達啲乜嘢。然後就變成咗你哋睇到個節目，佢不停攞呢一句出嚟做soundbate。喺我角度睇，佢哋都係為收視為流量啫。我改變唔到，你哋點睇電視，但係從我角度嚟睇，你哋都係喺嗰幾十分鐘嘅節目入面，就好似覺得自己得到晒所有嘅資訊一樣，其實呢堆節目都係喺一個前提底下（留意番，節目入面班主持所問嘅問題，全部都係引導性㗎啦），令你哋嘅情緒側向一邊咋嘛。所以，我依家都係保持嗰個諗法㗎，真相？你哋真係想搵真相咩？我都有睇部份嘅留言，全部都係偏頗性嘅，大家只不過想搵個你哋睇唔順眼嘅人你攻擊吓啫。」

張潤衡晚上表示︰「過去大半天，我花了很多時間回覆部分留言，主要是因為一些不實指控已經困擾了我十年，我覺得有必要澄清一些無理和被歪曲的說法。我已經盡力回應了許多問題和留言。現在是星期日晚上9:40左右，從這一刻開始，我會暫停回覆所有留言。原因很簡單 - 我需要在太太回來前晾好衣服，而且公司還有一堆工作等著我處理，是時候回到現實生活中的責任了。明天又是一個Blue Monday，我的工作計劃已經排得爆滿的（明天在中心有三個case要處理、同事正追殺緊我有幾份表格要處理、仲有兩個小組要帶、晚上仲要返自己公司處理一些工作），恐怕沒有太多時間查看手機。我已安排同事幫忙跟進這個帖子的留言。我以向同事作出指示- 所有帶有冒犯性和滋擾性的留言會被舉報及封鎖，而希望理性討論的留言，我會在有空時嘗試回覆（請見諒，社工嘅工作真係好忙，我依家都有少少想逃避睇到我今個星期嘅schedule ）。再次感謝大家的關注，祝各位有個愉快的晚上。」

對於張潤衡的指控，電視廣播有限公司助理總經理（企業傳訊）黃德慧表示︰「本台一向秉持真實報道為原則，節目亦按專業守則嚴謹製作，對於個別言論，本台不作進一步回應。」

（即時娛樂）