Ray Online｜區議員趙式浩派白色利是封被轟大吉利是 解釋年頭用紅色易「火上加火」
農曆新年講求意頭，不過最近有街坊炮轟經民聯南區區議員趙式浩竟然派白色利是封，真係「大吉利是」。趙式浩由風水角度解釋喺年頭用紅色，容易形成「火上加火」。而佢係專程揀金黃色做底色，不就承認打印效果唔理想。
原來趙式浩喺2008年左右開始學風水命理，但喺疫情前因為一啲原因已經「金盆洗手」。估唔到今次重出江湖，趙式浩喺社交網頁解畫，話上年係乙巳年，今年係丙午年，呢兩年都屬火。加上上年係蛇年（巳年），亦代表烈火之象。佢話「正因如此，去年火災頻繁」。佢話一年之初嘅選擇好重要，如果喺年頭用紅色，容易形成「火上加火」嘅情況。佢就由南區風水角度考量，希望新一年風調雨順，所以避免用紅色作為主色。
設計是主觀選擇
考慮到黃色屬火，火生土，趙式浩揀咗金黃色做利是封嘅底色，減緩火嘅影響。但佢承認打印出嚟，黃色底色比較淡，呈現出偏白嘅效果，對於令部分居民不滿，佢表示歉意。同時，已經向印刷公司嚴正反映問題。趙式浩話其實設計係主觀嘅選擇，如果街坊唔鍾意呢個設計，辦事處仲準備咗其他利是封，居民可以自由揀選。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)