羅力威剖白淡出樂壇5年原因　外母病逝女兒有高敏症︰影響好大

現年39歲的羅力威於2009年參加亞視《亞洲星光大道》奪冠後入行，是香港選秀界代表兼始祖。2010年還未出碟，他已經入圍當年《叱咤頒獎禮》「我最喜愛男歌手」及「我最喜愛歌曲」五強，人氣一時無兩，不過近五年卻消失於樂壇，三年前約滿英皇後亦未再簽約新公司。羅力威近日相隔五年以獨立歌手身分再出歌，自資推出新歌《悠揚一曲》，他接受電台訪問的片段今日（26日）播出，親自剖白暫別樂壇五年因由，當中亦談及目睹當年同屆戰友陳蕾及古淖文，近年成績突飛猛進的感受。

羅力威2018年與雨僑結婚後，婚後育有一對子女，不過這個幸福四口之家近年經歷不少挑戰，他在訪問中首度披露五年來家庭經歷多重巨變，至今才有空重投音樂創作：「呢首歌我一直無講明，無乜人知阿僑媽咪係教師。兩年前阿僑媽咪過生，對我哋影響好大，因為我哋無經歷過親人離世。」他透露大女Harper出生初期，雨僑媽媽同時發現患癌，再加上囡囡患有「高敏症」，令一對新手父母由喜變悲、措手不及，他憶述：「BB女出世本來好開心，阿僑媽咪點發現有病？就係幫手湊外孫嘅時候突然好辛苦，再去做身體檢查發現有病。所以嗰個階段，原本諗住三代同堂好開心，但突然成件事反轉晒。因為我要做好照顧者兼安慰者，睇見太太係好心痛。」及至大女三歲高敏症改善及開始入學，羅力威坦言多了空間才創作《悠揚一曲》，他亦披露太太首聽時感動痛哭：「當時只係得電子琴，我叫佢過嚟坐響我側邊，由頭到尾唱畀佢聽啱啱填好嘅詞，佢都好感動都有喊。」

羅力威神隱五年，與英皇唱片的十年約亦於三年前約滿，羅力威指夫妻收入主要來自雨僑的網店，而他幫手已經成七、八年，感恩生意不錯。他坦承當年簽英皇十年，合作並非暢順：「十年都係一個試用期，坦白講一定係唔夾。但好老實，我同好多人都唔會夾。唔單止係對一間公司，真係好難要求對方諗法同我一樣。」至於選擇自資出歌不再簽公司，羅力威亦說：「好老實，我唔抗拒。但係比較難傾得成，因為我係羅力威，我會假設同我相處嘅人都係羅力威，唔想有溝通上唔順暢。」這回自資出歌因為要計錢，羅力威坦言未知下一首計劃：「希望有唔同渠道嘅支持，support到我下一首。因為我從來都唔想將創意同金錢掛鉤，我唔想金錢影響我創意發揮。」

羅力威重投樂壇，他指不擔心樂迷善忘，至於五年來見證同屆戰友陳蕾及古淖文先後冒起，羅力威由衷地說：「首先我戥佢哋開心，我知道佢哋堅持追求呢件事好耐！古淖文係天生屬於舞台，每一個識佢嘅朋友都知。就算去茶餐廳，都登台咁嘅款，哈！會好王者姿態咁叫餐蛋治。而我，我好清楚自己要啲乜嘢、鍾意啲乜嘢。譬如如果有人叫我參加《中年好聲音》，我唔會答佢我去定唔去，我只可以回應，呢個人並唔了解我。」