叱咤︱馮允謙奪金謙稱霉咗兩年　想學李幸倪「萬年金」

歌手馮允謙和李幸倪分別獲得「叱咤樂壇男女歌手」金獎，李幸倪表示看到馮允謙拿到男歌手金獎感動到喊，等他拿獎等了好多年，很戥他開心。馮允謙稱做歌手的路有起有落，自言並不順利，記得差不多30、31歲時加入公司：「之前霉咗兩年，諗住放棄做其他嘢，公司仍然肯畀呢個30、31歲肥嘟嘟、腫樣爆牙男仔唱歌，佢哋開會時應該有少少質疑，我知我係難做，好難起番身。」明白唱歌好多方面配合，感謝公司改變他的人生，落台時忍不住喊。問會否加簽公司作報答？講笑不知道公司想不想簽他，並向老闆講I Love You。

對終於打破宿命只有銀獎，他笑言以前參加歌唱比賽都只拿銀獎，未攞過金，所以今次是夢想成真。像李幸倪做「萬年金」？笑言唔敢講，會努力。李幸倪認同做歌手很難，要天時地利及配合時機，感慨說追夢路好孤單，會多次質疑自己，自言也拿過4次銀，今次冧莊女歌手金獎，覺得「阿金」名字好吉利，不會因此感壓力，會視為推動力，每日做令自己開心有意義的事，又有好成績的話就很完美。之前馮允謙寫過《新牌仔》給李幸倪，原來還有另一首作品尚未完成，此新歌剛好是一首合唱歌，問二人可有機會合唱？李幸倪覺得是好提議，待忙完演唱會後再考慮。

馮允謙今次拿金後可以正式迎娶圈外女友Crystal？馮允謙透露2025年兩家人都發生了點事，未諗結婚一事，他說：「頭先台上漏咗多謝佢，5、6年前無工作時想過放棄，佢畀鼓勵無遺棄我，頭先台想講多謝，就起音樂cut咗，想講好幸運遇到佢。」李幸倪表示獲獎後要繼續返工，未有時間慶祝，因為要準備二月演唱會。

東網網站 : https://on.cc/東網Facebook專頁 : https://www.facebook.com/onccnews/