譚嘉儀歌酬被走數爆羅生門　主辦人：我都要追番佢錢

譚嘉儀於2024年10月在演藝學院舉行3場《Be With You演唱會2024》，事隔一年多，為演唱會擔任和音的Kasey Pong早前在社交平台公開未收到應得酬勞，而譚嘉儀亦向傳媒透露未收到6位數演出費，更自稱是苦主，又提到主辦方負責人Jelly已讀不回，並指會繼續追討自己應得的歌酬。

為演唱會擔任和音的Kasey Pong於1月28日在社交平台出帖文：「2024年係我覺得好大突破嘅一年，因為做咗譚嘉儀演唱會嘅和音。但係好可惜，到今日我哋成個團隊都仲未收到應得嘅酬勞。」而被指是演唱會主辦人的Jelly，今日（2月6日）在社交平台出帖文為事件解釋，澄清自己不是主辦人，並直指譚嘉儀稱自己是苦主完全是無稽之談。

被指是演唱會主辦人的Jelly出帖文寫道：「就近日各傳媒報道有關於《譚嘉儀Be with You 演唱會2024》提及到我失蹤、公司執笠同走數等等嘅事宜，因為已經影響到我身邊嘅人包括姚子羚小姐及DJ樂宜，所以我有必要同大家講返事情嘅真相。當時因為譚小姐仲係TVB合約，而佢自己好想搞一個完全屬於佢並可以自己主導晒嘅演唱會，所以就需要其他人去幫佢做呢件事，作為朋友嘅我當時就答應幫佢執行，並且係由譚小姐本人注入資金去做。成件事由海報設計／舞台設計／歌曲／服裝／Dancer／Rundown／嘉賓／慶功等等全部都係由佢去話事。但最後佢竟然表示自己只係打工？！還無稽到同傳媒講自己也是『苦主』？」

Jelly表示要調轉向譚嘉儀追錢：「至今已經接近一年嘅時間譚小姐同我的確無聯絡，我唔理解點解譚小姐會話搵我唔到？只係佢冇搵我，不是搵唔到。因為今次本人嘅愚蠢我亦付出左（咗）代價，借貸去找一啲款項，其實調返轉我應該要向佢追討返呢啲嘅款項。最後，我想講，我並不是主辦，我都要追番譚小姐錢。我肯定呢個演唱會就算賺錢亦都與我無關，因為會係歸晒譚小姐所有！」