【專訪】港足五人代表想做埋大港腳 周家樂：為己為港爭啖氣
【獨媒報導】港足晉身亞洲盃決賽週，長江後浪推前浪，年輕球員成為未來希望。23歲的周家樂曾效力理文，但不獲重用，去季在香港U23成為常規正選，現在不但是港足五人代表隊成員，早前曾入選香港23歲以下代表隊訓練名單。他接受《獨媒》訪問指，希望能雙線發展，「想為自己，為香港足球爭啖氣，證明俾人哋睇，我哋係有能力同其他國家對抗。」
1999年出生，今年4月剛滿23歲的周家樂，在剛過去球季效力香港 U23，是球隊常規正選，約滿後現正尋找新球隊落班。他早前首次入選港足五人代表隊，出戰亞洲盃外圍賽，更在對日本的賽事中取得入球。對這名小伙子來說，用吐氣揚眉來形容絕不為過。
港足五人代表隊在最後一仗迫和韓國，主教練曾偉忠在賽後鼓勵球員，「我哋真係攞到分返屋企呀，真係呀！個個搏返嚟㗎，曾sir 以你哋為榮。今日先至係開始好無！」片段出街，熱血得要命。
踢五人足球受蘇來強影響 學習製造人數優勢
踢五人足球，周家樂其實受師傅蘇來強影響，數年前參與選拔，初次為港足踢U20五人足球亞洲盃，「踢五人係另一種體會，閱讀球賽能力都會好咗，學習製造人數優勢。」
6歲踢波，11歲加入傑志巴塞足球學校，踢到U16轉去自由人跟隨蘇來強，在董之英中六畢業後沒有讀上去，周家樂早已立志做職業足球員。自由人創辦人之一、當時效力理文的趙俊傑，帶周家樂去港超聯球隊理文流浪跟操。總監馮嘉奇及主教練馮凱文給了周家樂一紙合約。
在理文的首年有一定機會，周家樂在聯賽、菁英盃都有上陣。他學會了一件重要的事，職業足球不能輕易失去控球權。不過，人生的控球權，則不太自主。
遭陳曉明打入冷宮 嘆對年輕球員信任度低
陳曉明在翌年入主理文，周家樂立即遭打入冷宮，他承認和對方有點意見不合，「少少唔開心吧，個陣可能踢得唔夠好，都無可厚非。」不過，周家樂質疑陳曉明對年輕球員，包括自己的信任度很低，在練波的時候更出現大細超的情況，「可能我唔係佢哋嘅人吧。」
開心踢波，唔開心踢波，懷疑人生都去踢波，無得踢草地，周家樂去街場寓賽於操，區內的街場都留下他的足跡。他試過對朋友吐苦水，「我其實係咪真係咁差呢？」記者亦不禁問道，「你有無諗過放棄？」周家樂大方得很，「我從來無諗過放棄，只係佢（陳曉明）唔賞識啫，我會更努力去證明。」
果然，在2019年至2020年球季，理文未有和周家樂續約。他形容是心知肚明，「大家都知唔係好夾」，同不獲續約的有早前離世的黃駿軒、談樂軒及陳銘剛，「其實無預料過㗎，因為事前無傾過。佢（陳曉明）捧你咪同你講多啲嘢，咪會對你好囉。」
「你明唔明？係連坐後備席都無份。」縱使在後備席坐到懷疑人生，周家樂始終相信，「自己唔係咁差。」在理文，周家樂明白人情冷暖，但球場事球場了，「好現實嘅，唔適合咪去其他地方囉，總會有人賞識嘅。」
蘇來強推薦加盟流浪 重拾出場機會
不獲理文續約無班落，蘇來強替他找流浪助教黃展鴻，周家樂去了流浪跟操，為球隊踢東南海盃，雙方一拍即合。周家樂感謝流浪總監李輝立、主教練招重文和黃展鴻的支持。他在流浪的出場時間不少，累積了實戰經驗，在左閘、中場輪住踢。
流浪上季將周家樂推薦到新軍組成的香港U23，原因是希望提拔更多年輕球員，加上賽制規定，必須派出不少於三名U22本地青年球員出賽，「我喺U23好多機會，聯賽同菁英盃都正選，我憑努力爭取返嚟，嗯，我諗爭氣都好重要。」
成香港U23常規正選 讚張健峰有執著
來到香港U23，周家樂踢出水平，成為球隊常規正選。主教練張健峰一直受年輕球員歡迎，周家樂亦讚不絕口，他大讚對方有執著和要求，並且注重細節，和球員亦有商有量，「有得出場，就一定開心。」
香港U23去季輸多贏少，一班年輕球員倒是齊心得很，周家樂認為結果重要，內容同樣重要。「好多嘢都可以再做好啲，防守企位、心態都要改善，需要再強啲。」「輸東方七球係好有無力感 ，但俾人睇到我哋輸嘅比數都收窄緊。」
左腳仔的偶像通常都會係左腳球員，流浪隊友林嘉緯不但是周家樂的偶像，更是他的模仿對象。「細個踢傑志就覺得嘉緯好勁，喺流浪可以一齊踢波係夢想成真。」
約滿重返流浪跟操 考慮改循中場發展
理文不獲續約後，周家樂曾入選香港23歲以下代表隊成員，今次則是第二次，但心情已不能同日而語，雖然最終未能入選東亞足球錦標賽的大軍名單，周家樂希望能繼續進步，「想自己再好啲，做埋大港腳。」
周家樂早前已約滿香港U23，現在重返流浪跟操，他透露正和數支球隊接洽。說未來，談志向，周家樂接受訪問亦準備充足，還帶了貓紙，「我驚多謝漏咗人嘛。」
有一件事，周家樂其實還有點十五十六。因為蘇來強的一番說話，他希望從中場發展，「我宜家左路多，但佢認為我有能力踢中場。」「講目標，只希望可以成為大港腳，穩定地有出場，有更多人賞識。」
記者：麥馬高、周頌謙
版權: 禁止衍生