容祖兒個唱海報搵林海峰操刀 呼籲歌迷想聽心水歌在IG留言

容祖兒宣布7月再度在演藝學院舉行33場side track個唱《AIA PRESENTS ANOTHER SIDE …… JOEY · MY SECRET · LIVE》！祖兒表示有不少朋友問她為何這麼辛苦開33場，她說：「當然開紅館係一個選擇，明年或者會開紅館呢，哈哈。今次我揀 APA（演藝學院）先，係好想有一個同觀眾超近距離去分享時光，APA無論係做騷或者睇騷，都會得到另一個層次的感受同感動，而且歌迷都問咗我六年，會唔會再開呢種騷，咁檔期及所有工作都可以配合，就即刻決定再做多次，好想同大家一齊再享受一下呢種近距離親密時刻。」

早前祖兒為該騷影海報，當日林海峰影了個多小時就宣布可以收工，令她也嚇一跳，「真係好多謝阿Jan，影海報嗰陣佢其實自己好忙，又舞台劇，又好多其他工作，上一次都係佢設計海報，同Wing Sha影，今次我好想原班人馬再出發，所以Jan再忙最後都答應幫我做，由我入行至今佢都一直默默支持我，我幾乎全部紅館騷都係佢幫我錄好多VO，初出道嗰陣佢又喺電台節目大力推介我呢個新人，所以有佢幫我設計海報，我會好安心，依家我經常經過隧道附近個位見到自己張海報，我個心都會諗起佢，好多謝佢揀咗呢張相，真係好呈現到一個最舒服悠然自得的我，一張相就已經話到比大家感受到，今次係一個如何私密及悠然自得的騷。」

歌迷想聽心水歌快啲去Joey在IG留言啦！

至於彭秀慧，祖兒表示上次是她做導演，今次當然都係她去負責，「APA係佢主場嘛，女導演會係騷入面浸多一份溫柔，哈哈。彭秀慧話上次咁好，今次都有壓力，我信佢好有壓力，因為佢份人咁認真，一定會要求超越上次，所以連月來佢都不停迫我哋開會開會開會，佢已經聽緊我幾百張唱片揀歌，我想同步開放比歌迷一齊揀，大家想聽咩去我IG 留言，寫低歌名，我地一定會睇到研究係咪適合，快啲留言俾我啦。」