新年樓下保安又開始精神教你4招如何避開保安攻勢！

更新於 2022年01月28日05:27 • 發布於 2022年01月28日13:24

「年~又過年」，新年又到，又係時候開始問親戚朋1友逗利是嘅時候。不過一到此時，你住的大廈樓下嘅保安都會開始精神，你會開始莫名見到一啲未見過嘅保安，唔知由邊度嚟嘅保安隊長等等，今番筆者教大家如何避開保安，唔使派咁多利是！

相信身為有禮貌嘅香港人，平時都一定會對自己樓下嘅保安打招呼，唔多唔少都會認得佢哋嘅樣。呢個時候一落樓見到成班保安準備衝埋嚟恭喜你嘅時候，試吓先入為主，入佢中路，直衝相熟保安度再講聲恭喜發財，然後再塞封利是俾佢，最後用趙雲七進七出嘅技巧全身而退，完美！

一定要睇啱時機搵相熟保安。（圖片來源：新Monday珍藏片段）

之後全身而退就可以了。（圖片來源：新Monday珍藏片段）

拖字訣呢招雖然陰濕，但係其實十分有用。每次落樓見到保安開始湧上嚟，就即刻厚面皮再加啲劉德華演技講聲：「哎呀！唔記得帶利是落樓！」，順勢用Michael Jackon Moon walk向門口方向移度，呢個時候最好口中再伴隨著：「走先啦係咁先啦，下次再派啦」，目的係教班保安多啲支持廣東歌。

拖住佢哋下次先俾，拖拖吓就完新年啦。（圖片來源：新Monday珍藏片段）

佢哋一定會咁樣望住你。（圖片來源：《回魂夜》劇照）

依家香港疫情相當嚴重，每個人對於染疫都十分擔心。可以試吓帶定利是，當保安開始展開攻勢之時就起勢咁咳，咳到個肺好似就嚟甩咁就最有用。當佢地一呻手之際你就一路咳一路拎利是，佢哋一定會避而遠之，連拎都唔敢拎，即慳幾封！

咳到甩肺佢哋點都驚！（圖片來源：《九品芝麻官》劇照）

驚到攬埋一嚿。（圖片來源：《回魂夜》劇照）

如果你對於以上方法都比較唔想做的話，就唯有用成本降低大法了。呢個時候你需要幾種唔同嘅利是封，而唔同利是封入面嘅裝住嘅金額都唔同。而保安個幾封就….你哋自行根據財力去決定吧！又唔可以太少唔可以太多，呢個拿捏位唔係咁易，不過咁大個人要掌握吓！

真係唔得就唯有降低成本。（圖片來源：新Monday珍藏片段）

佢哋唔會即場拆人情嘅！（圖片來源：新Monday珍藏片段）

N
駛咩諗咁多野，想派就派唔想派可以唔派！唔好以為我隨口噏，我未結婚都係做私人屋苑（so called豪宅）嘅物業管理，講得難聽啲，記鬼得邊個有派邊個無派咩～年初一二三，就算我哋做寫字樓入面嘅，都會出晒嚟大堂企晒喺度，因為啲住戶一派就派晒咁多位！當然都有啲人係好介意，會問點解無見過你（我會答佢我就坐入面房，然後指一指旁邊間房，佢就黑口黑面咁派）；我哋出得黎攞利是，當然係厚住面皮，因為一日最少幾百蚊，有啲住戶豪爽啲，一日兩千蚊利是都試過！調返轉係你，你都會厚住面皮企喺度！所以，唔想派嘅，其實直接無視即可！年頭果幾日，直接走左去就可以！只有比物管職員更厚面皮，你先可以俾少啲利是！我知每個住戶都有相熟嘅物管人員（我都有住戶特登見我放假放低利是俾我架！），其實你唔駛急，只要去到初五初六，甚至可以去到初七後，大堂回復正常，就可以行去派俾相熟職員！熟你嘅就唔會介意你幾時派嘅！最後，派利是本來係開心事，想派就派唔想派就唔好派！真心，我哋其實認唔晒咁多住戶，你有冇派其實好快就會唔記得架喇！（直到下個新年大家先會再次討論邊個派得多！）利申：試過有藝人真係會派利是比較重手！可能始終太多人識
2022年01月29日10:09