東方日報C1：周柏豪獨撐幾頭家　月使6位數

現年41歲的周柏豪近年在內地密密撈，雖然要養3頭住家，每月開支達6位數字，還加埋一身長遠的「兒女債」，但他不願減工作量，坦言現時是最幸福的時刻。柏豪婚後成為緋聞「絕緣體」，在內地工作期間，食飯時間也要𥄫實家中的閉路電視，被讚是現實版「多功能老公」。

入行18年的型男周柏豪剛完成了整整橫跨一年的《CHAPTER IV》粉絲見面會巡演，近年多於內地工作的他，將於3月在啟德體藝館舉行全新巡迴見面會，是他相隔7年再度回到香港開騷。推出新歌《時辰未到》的他接受本報專訪，談到早前戴住呼吸儀器在長沙趕拍內地綜藝節目《披荊斬棘的哥哥5》，令粉絲肉痛又擔心，他表示只屬閒事，更向粉絲大派定心丸說：「其實幾年就一大病，上年10月嗰次就『甘』啲，連聲都冇埋，睇咗專科、食咗藥就冇事。聲帶好似肌肉咁要操，畀多啲挫敗感佢，自己修復好就再勁啲。」

他戲言久病成醫，開工有藥袋傍身，笑言可當「醫生」：「自己醫自己嗰種。」問可有考慮減低工作量，他即耍手擰頭說「唔好啦」，自認天生辛苦命：「我呢個人一靜落嚟就好多奇怪事，病係因為休息，我去個短途旅行，聲帶出事又鼻敏感，不過我意志力好強，做嘢時就算唔舒服都頂得住。」又指經歷4年疫情閒在家中，格外珍惜現時於工作中覓得自我價值。

育有一子一女的柏豪是家中經濟支柱，雖然近年工作密麻麻，但他不諱言「周身債」，一個人負責一家四口、父母及外父外母的生活及保險費，還有一堆長遠的「兒女債」，他說：「仔女啲基金、保險、學費要供到佢哋18歲喎！又再攞筆錢出嚟畀佢哋讀書。（每月開支要10幾萬？）一定要先可以經營到個家。（一個人養3頭家得唔得㗎？）照顧到家人好開心、好滿足，依家係最幸福嘅狀態。」

睇閉路電視遙距「𥄫女」

多年前柏豪在無綫劇集《多功能老婆》飾演暖男Oppa深得觀眾歡心，現時則獲讚為現實版「多功能老公」，他自嘲更似「緊張爸爸」，每日寧願捱眼瞓也要親自接送仔女返學、放學：「唔想佢哋覺得爸爸只係個司機，雖然我係藝人，但喺學校門口照派心畀佢哋。就算我喺內地做嘢，抱住個飯盒都係睇住屋企部9格『老閉』（閉路電視），想知佢哋做緊乜，陪伴重要過畀物質。」

問是否重女輕男，他雖口說仔女一樣愛錫，但早熟的囡囡令他相當頭痛：「囡囡5歲咋！落公園玩都扮到好靚，小背心、頭髮放埋一半。（阿女要拍拖點算？）最好唔好啦！佢30歲唔拍拖都冇問題。（阿女始終要嫁人。）跟埋去囉！如果佢要嫁去非洲都冇法，佢肯講畀我聽都要多謝佢。（畀晒啲錢個女傍身？）我會將啲錢畀晒個仔，畀晒個女咪即係益咗人（女婿）。」

柏豪婚前曾跟師妹連詩雅、鍾浠文、薛凱琪及何超蓮傳緋聞，婚後旋即變「絕緣體」，他覺得跟「妻管嚴」無關：「全世界都知我結咗婚、有仔女喎！同埋我要早起送返學，唔得閒夜蒲，就算應酬都唔可以太夜。」

更多新聞，請瀏覽東方日報網頁：

https://orientaldaily.on.cc

東網網站 : https://on.cc/東網Facebook專頁 : https://www.facebook.com/onccnews/