曾幾何時，想入屋想成名，無嘢快得過電視台，幾多天王天后小生花旦就係咁樣平步青雲紅遍大江南北。今時今日，想入屋想成名，一部電話一個社交網絡帳號已經萬事俱備，再加上疫情反覆本港娛樂圈工作機會大不如前，繼小生花旦北上或者自組工作室，甘草綠葉又離巢恢復自由身出外闖蕩後，最近再爆年輕一輩逃亡潮，走完一個又一個，長青劇《愛‧回家之開心速遞》正是重災區！
撰文、圖片：東方新地
TVB爆新一代離巢潮
22歲的劉子碩（Zac）生於寶島台灣、讀過上海戲劇學院、能演能唱最緊要高大靚仔形象陽光，18年來港發展去年簽約星夢，日前 (9日 )出街的《 #後生仔傾吓偈》突然變成劉子碩歡送會，而 Zac亦在出發前一個星期在個人 IG正式宣布動向：「來香港兩年多，下禮拜要離開了！這兩年有多辛苦多幸福我都會收在心裡，希望大家可以祝福我的決定，不要覺得可惜或遺憾，因為未來發展成甚麼樣子我都會完全接受。香港的家人朋友要常常給我打電話喔，現在這一刻真的超級踏實，一切都很圓滿，感謝！」
劉子碩剛剛宣布話返台北，上周最後一集《 #後生仔傾吓偈》馮盈盈、6號、戴祖儀個個都唔捨得。22歲仔唱得演得高大又陽光，仲要有身材，從此電視台又少一個小鮮肉。來港第二年已經簽約星夢有歌出，亦被無綫睇好有得幫一姐菊梓喬拍 MV。唔止 Zac一個，明明香港有個男朋友朱敏瀚，17年華姐冠軍余思霆都話返老家。據悉因為台灣疫情穩定、余思霆又持有台灣護照出入方便，被無綫特派到台灣拍攝旅遊節目《台北玩起來》。不過拍攝節目最多兩、三個月，余思霆就話未知回程、短則半年長則一年，機票都索性買單程，仲出埋 Po道別又係多謝香港朋友和貴人、話會掛住香港，其實呢個 job前，余思霆坐冷板凳超過半年，曾言對前景感迷惘。
同朱敏瀚拍拖一年、余思霆宣布返台北老家！雖然係被無綫委派拍攝旅遊節目，不過當事人就表示未知歸期。17年爆冷當選華姐冠軍，一卸任就同陳婉衡、陳凱琳等人齊齊著三點式拍旅遊節目，絕對係余思霆個人代表作。外形甜美又嬌嗲，除咗主持工作，余思霆亦劇接劇備受力捧，人不在港，不過仲有新劇 《愛美麗狂想曲》等出街。過檔友台新希望
現今娛樂生態與以往大不同，又有大把離巢後發展更好收入更高成功例子，半年來不少資歷尚淺剛剛起步男丁小花都先後離開電視台，尤其《愛‧回家之開心速遞》最多人事變動，「細龍太」陳偉琪衰醉駕隨時被解約、「 Dorothy 」邱晴同「 GiGi 」陳婉婷分別轉投ViuTV、仲有「垃圾清」周梓盈、「 Keyboard 」李興華不獲續約。不過舊嘅唔去新嘅唔嚟，離開無綫分分鐘更多機會，而拍足千三集，《開心速遞》又正好換吓血添吓新意，可能都係好事一件。
啱啱慶祝完拍完1,300集破埋 《真情》紀錄， 《愛‧回家之開心速遞》 近半年最多演員離巢角色有變動，不過彈出又彈入故事線夠靈活亦都係 《開心速遞》 最大特色。陳偉琪外形狂野又被多次拍到流連夜店身邊有不同男伴，一向有傳無綫不滿形象欠佳，陳偉琪去年再衰多鑊醉酒駕駛，正式被飛出《開心速遞》。近日當事人接受訪問都直認多個月冇工開，透露密謀有新發展。蕭徽勇入行19年、肥仔變 Fit佬、更大有機會成為金牌配音人譚炳文接班人，可惜蕭徽勇都盛傳11月約滿後會離巢。當事人未有回應，不過幫《錦鏽南歌》配音自稱可能最後一次，同劉溫馨拍完《換命真相》都話有緣再聚。李興華入行十年默默耕耘、終於靠《開心速遞》IT三子成功入屋有人叫得出名，李興華都話約滿後唔會再同無綫簽長約，自爆未來會外闖拍網劇、參與新媒體拍攝工作。今年一月，「垃圾清」周梓盈因為不獲 TVB續約而告別《開心速遞》，最新動向係同同學合股賣手工鳳梨酥。何君誠08年參選香港先生入行，09年加入戲劇組拍劇，更成為金牌監製林志華常用演員，不過18年同無綫不再續約，轉赴蒙古開牧場同旅館。林師傑09年參加第一屆《超級巨聲》入行，今年與太太歐陽巧瑩前後腳離開無綫，離巢後林師傑繼續歌唱事業，剛剛推出獨立製作新歌〈尊悲不分〉。陳婉婷11年加入無綫，18年因為《開心速遞》GiGi一角入屋，去年九月宣布離巢，家陣係直播平台主播，亦獲 ViuTV邀請在劇集《地產仔》中有演出機會。邱晴17年參選港姐入行，是《 Think Big天地》的主持今年五月自爆由經理人合約改簽新約變相離巢，邱晴話完唔想成世做電視希望借網絡世界獨立發展後，最近為 ViuTV拍攝新節目《家務戰場》。