戴祖儀 陳曉華不畏強權 讀彭秀慧戲劇班同姜濤做同學 親親ViuTV打成一片

自從曾志偉回巢無綫出任副總經理（綜藝、音樂節目及製作）後，無綫中人心惶惶，恐怕自己成為下一個被開刀目標，但仍有不少初生之犢不畏虎，包括戴祖儀、陳曉華及鄭衍峰。三人早前參加了彭秀慧的戲劇班，學戲當然冇問題，問題出於九成同學都來自ViuTV的《全民造星3》，十堂課程完結，彭秀慧與學生們先後放合照上社交網，意外發現姜濤也是學生之一。奀星鄭衍峰都算，戴祖儀與陳曉華都是無綫力捧花旦，卻搵與ViuTV關係要好的彭導學戲，真係唔怕公司嬲？

撰文：東方新地 圖片：彭秀慧fb圖片、陳曉華IG圖片、鄭衍峰IG圖片

戴祖儀敏感時期跟彭導學戲

戴祖儀是近年備受無綫力捧的花旦，有家底背景乾淨，而陳曉華是港姐冠軍，平時聽聽話話無綫亦睇重安排入劇組，二人應該不在被清算余黨之列內，可是在這個敏感時期，二人竟與ViuTV扯上關係。彭秀慧（Kearen）集編、導、演、教、寫於一身，去年為ViuTV的《全民造星3》做導師，以惡出名，近年未曾見彭導與無綫有任何合作，可見她與ViuTV關係密切，《造星3》結束後更開班教做戲，除了多位《造星3》學員報名(包括Tank、芳芳、右雨及Polly等)，原來無綫藝員戴祖儀、陳曉華及鄭衍峰都成為她的學生。

姜濤低調合照被發現

彭秀慧在社交網上載了多張與學生們的合照，來紀念過去十堂的相處，每張照片都喜氣洋洋好熱鬧，戴祖儀、陳曉華與鄭衍峰與其他《造星3》的學員都打成一片，扮鬼扮馬一齊做鬼臉，唯一一張所有人都戴上口罩的合照，竟有意外驚喜，有眼利網民一看就發現站在最前負責揸機的就是姜濤。過去多年，除了公益金百萬行會令不同電視台的藝員同框外，甚少見無綫藝員與ViuTV藝員咁有交流，再加上最近無綫的人事變動，上位花旦小生分分鐘大執位，在這個時候親親ViuTV似乎好唔恰當。

陳曉華與ViuTV特別有緣

除了戴祖儀，18年港姐冠軍陳曉華同樣膽生毛，這位近年最快上位港姐，罕有地唔使再做花瓶角色，去年在處女劇《迷網》已飾演要角，雖然表現未有太大迴響，但隨後已得到多位監製賞識，先後在劇集《七公主》及《食腦喪B》演劇中要角，陳曉華更破了港姐最快擔正做「女一」的紀錄，去年為新劇《異搜店》擔任女主角。表面上乖乖女的陳曉華，早前曾與MIRROR成員Ian傳出緋聞，可見她與ViuTV早已結下不解之緣。戴祖儀與陳曉華冒住咁高風險都要跟彭秀慧學戲，究竟係想見姜濤一面，抑或自知演技太屎真係要惡補呢？