戴祖儀狗狗改壞名　似Zombie咁喪！

「宅男女神」戴祖儀愛犬有個有故事的超長名字「Happy Zombie Boy」，無奈「不怕生壞命、最怕改壞名」，她笑言可能改錯名，搞到愛犬相當癲喪！

戴祖儀的約瑟爹利愛犬由BB養到現在5歲大，是屋企的寵兒，更有個超長名字「Happy Zombie Boy」，每次讚牠都會興奮狼叫，相當搞笑，祖儀說：「最初係叫Zombie，因為有型又反映到癲喪一面，但媽咪覺得好似唔係好吉利，所以加入Happy喎！成日叫Happy成家都開心，之後又覺得不如加埋Boy就更順口，叫叫吓依家變咗Boy Boy或Happy仔，哈哈！」

Zombie是祖儀家中第3隻狗，第一隻唐狗是初中回家時在路邊執的BB，第二隻是親戚的朋友棄養的北京狗。經歷過生離死別，祖儀媽本不想再養，但祖儀來一招先斬後奏，她說：「我媽超錫狗狗，平時同佢散步，畀佢食好啲好似牛肉、雞，依家佢變咗超級揀飲擇食，有啲佢食得嘅生果，我媽就揀啲靚嘅畀佢食先，我至知自己喺屋企嘅地位。」

又吠又咬爭寵

自知得寵的Zombie，平日更會與祖儀爭寵：「佢唔會亂咬嘢，但會咬我，因為我阿媽好錫佢，佢當咗我阿媽係佢主人，我行近阿媽佢就吠，再行近啲就會咬我。如果我媽喺度，惟有畀啲空間佢哋，我自己返入房啦！」

Zombie狗仔細細，但出街見到其他狗狗即變得興奮，見到大型狗也照撲上去：「出街要拖實佢，佢見到其他狗狗唔係想撩交打，係想做Friend，但有次衝埋去隻大狗度，畀大狗咬傷耳仔慘叫。佢唔會吸取教訓，之後一樣照衝，見人哋啲約瑟爹利好文靜，可能我改衰咗個名，唔應該叫佢Zombie啦！」

東網網站 : https://on.cc/東網Facebook專頁 : https://www.facebook.com/onccnews/